افغانستان : شدت پسندوں کا گاؤں پر حملہ ، بچوں خواتین سمیت 40شہری قتل ، متعدد افراد کو اغوا ء کر لیا گیا

افغانستان : شدت پسندوں کا گاؤں پر حملہ ، بچوں خواتین سمیت 40شہری قتل ، متعدد ...

  

کابل(مانیٹرنگ ڈیسک) افغانستان میں شدت پسندوں نے ایک گاؤں پر حملہ کرکے 40 عام شہریوں کو قتل کردیا جبکہ متعدد افراد کو اغواء کر کے اپنے ساتھ لے گئے۔افغان نیوز ویب سائٹ کے مطابق گزشتہ رات گئے شدت پسندوں نے افغانستان کے صوبے سرپْل کے مرزا اولانگ گاؤں میں دھاوا بولا اور 40 افراد کو قتل کر دیا۔ گورنر سرپل محمد ظاہر وحدت نے بتایا کہ زیادہ تر گاؤں والوں کے سرقلم کیے گئے جبکہ بعض کو فائرنگ کر کے ہلاک کیا گیا۔ انہوں نے یہ بھی بتایا کہ شدت پسند اپنے ساتھ کئی افراد کو یرغمال بناکر بھی لے گئے ہیں جبکہ ہلاک ہونیوالوں میں خواتین اور بچے بھی شامل ہیں۔ادھر افغانستان کے چیف ایگزیکٹو عبداللہ عبداللہ نے عام شہریوں کے قتل کی مذمت کی ہے جبکہ صوبائی ترجمان ذبیح اللہ امانی نے حملے کوبے رحمانہ اور غیر انسانی عمل قرار دیا ہے۔ برطانوی نشریاتی ادارے کے مطابق یہ معلوم نہیں ہو سکا ہے کہ حملہ آوروں کا تعلق کس تنظیم سے تھا تاہم گزشتہ چند دنوں سے جنگجوؤں اور سکیورٹی فورسز کے درمیان شدید لڑائی جاری تھی جس کے بعد شدت پسندوں نے مرزا اولانگ گاؤں پر قبضہ کرلیا تھا۔گورنرمحمد ظاہر وحدت کا کہنا ہے سکیورٹی فورسز یرغمالیوں کی بحفاظت بازیابی کے لیے جلد آپریشن شروع کریں گی۔ انہوں نے خبردار کیا ہے کہ اگر بروقت کارروائی نہ کی گئی تو یہ شدت پسند پورے ضلع پر قبضہ کر سکتے ہیں۔ اب تک کسی تنظیم نے اس حملے کی ذمہ داری قبول نہیں کی ہے۔

افغان قتل عام

مزید :

علاقائی -