ہمیشہ محنت و لگن سے گلوکاری کرتی ہوں، حناملک 

لاہور(فلم رپورٹر) گلوکارہ حنا ملک نے کہا ہے کہ میں نے ہمیشہ محنت اور لگن سے گائیکی کے شعبہ میں کام کیا ہے جو لوگ محنت نہیں کرتے وہ کبھی کامیابی حاصل نہیں کر سکتے۔ ایک سوال کے جواب میں حنا ملک نے کہا کہ حکومتی سرپرستی میں ہی موسیقی کو فروغ مل سکتا ہے ہمارے ملک میں ایک سے بڑھ کر ایک گلوکار موجود ہے مگر ان کو آگے بڑھنے کا موقع نہیں مل رہا۔حنا ملک نے کہا کہ موجودہ دور میں بننے والی فلموں میں جہاں نئے اداکاروں کو موقع دیا جا رہا ہے وہاں ہمیں نئے گلوکاروں سے بھی فائدہ اٹھانا چاہیے تاکہ مستقبل میں ہمارے پاس موسیقی کا ایک بڑا اثاثہ ہو۔ انہوں نے کہا کہ فنون لطیفہ حکومتی سرپرستی کے بغیر عروج حاصل نہیں کر سکتا۔ موجودہ حکومت فنکار نواز ہے اور فنکاروں کے حوالے سے مثبت اقدام اٹھا رہی ہے۔