نوجوان اپنے حقوق کے لیے نااہل حکمرانوں کے خلاف بھر پور جدوجہد کا آغاز کریں، سراج الحق 

نوجوان اپنے حقوق کے لیے نااہل حکمرانوں کے خلاف بھر پور جدوجہد کا آغاز کریں، ...

  

لاہور(نمائندہ خصوصی)امیر جماعت اسلامی سراج الحق نے کہا ہے کہ وقت کے جبر کی وجہ سے نوجوان مایوس، یوتھ اپنے حقوق کے لیے نااہل حکمرانوں کے خلاف بھرپور جدوجہد کا آغاز کریں۔ جاگیردار، وڈیرے اور کرپٹ سرمایہ دار اقتدار کو اپنا حق سمجھتے ہیں اورعام پڑھے لکھے نوجوان کی ترقی اور خوشحالی میں سب سے بڑی رکاوٹ ہیں۔ متوسط اور غریب طبقہ کے نوجوانوں کے لیے میرٹ پر آگے بڑھنے کے مواقع ناپید ہو چکے، صرف حکمرانوں کے بچوں کا مستقبل محفوظ ہے۔ پی ایچ ڈی اور ماسٹر ڈگری ہولڈرز قطاروں میں کھڑے درجہ دوم کی نوکریوں کی تلاش میں مارے مارے پھرتے ہیں۔ موروثیت اور ون مین شو کی سیاست خرابیوں کی جڑ ہے۔ صرف جماعت اسلامی ہی موروثیت سے پاک ہے جس میں نوجوانوں کے لیے آگے بڑھنے کے مساوی مواقع دستیاب ہیں۔ ہم چاہتے ہیں کہ نوجوان اسلامی انقلاب کے لیے جماعت اسلامی کا دست بازو بنیں، مسائل کا حل، ترقی و خوشحالی قرآن و سنت کے نظام کے نفاذ ہی سے ممکن ہے۔ ان خیالات کا اظہار انھوں نے جے آئی یوتھ کے اجلاس سے خطاب کرتے ہوئے کیا۔ سیکرٹری اطلاعات جماعت اسلامی قیصر شریف، مرکزی صدر جے آئی یوتھ محمد زبیرگوندل اور سیکرٹری جنرل جے آئی یوتھ شاہد نوید ملک بھی اس موقع پر موجود تھے۔سراج الحق نے کہا کہ جھوٹ اور گالم گلوچ کی سیاست پی ڈی ایم، پیپلزپارٹی اور پی ٹی آئی کا وطیرہ بن چکی، حکمران مفادات کے لیے عوام کو تقسیم کرنے اور لڑانے کی پالیسی پر گامزن ہیں۔ موجودہ اور سابقہ حکومتیں ملک کو مسائل کی دلدل دھکیلنے کی ذمہ دار ہیں۔ بڑی سیاسی جماعتیں استعمار کی غلامی پرمتفق، ملک میں وہ نظام نافذ ہے جس کا نظریہ پاکستان سے کوئی تعلق نہیں۔قوم حکمرانوں کے بیانیہ میں تبدیلی کا دلچسپ کھیل دیکھ رہی ہے۔ کل جو بیانیہ مسلم لیگ (ن) کے صدر اور موجودہ وزیراعظم کا تھا آج وہ باتیں پی ٹی آئی کے چیئرمین اور سابقہ وزیراعظم کر رہے ہیں۔ بیڈ گورننس اور ناقص معاشی پالیسیوں کی وجہ سے ملک آئی ایم ایف کی غلامی میں چلا گیا۔ انھوں نے کہا کہ ملک کی آدھی آبادی پینے کے صاف پانی سے محروم، بہترین زرعی زمینیں ہونے کے باوجود زرعی اجناس امپورٹ ہو رہے ہیں۔ جماعت اسلامی اقتدار میں آ کر زرعی گریجوایٹس اور پڑھے لکھے نوجوانوں کو سرکاری اراضی لیز پر دے گی۔ نوجوانوں کو بلاسود آسان شرائط پر قرضے دیے جائیں گے۔ 

سراج الحق

مزید :

صفحہ آخر -