وزیر اعظم نے بھارتی ہم منصب سے پیرس میں سشما سوراج کی ہارٹ آف ایشیا کانفرس میں شرکت پر بات کی ، سرتاج عزیز

اسلام آباد(مانیٹرنگ ڈیسک)مشیر خارجہ سرتاج عزیز نے کہا ہے کہ وزیر اعظم نواز شریف نے بھارتی ہم منصب نریندر مودی سے پیرس میں ہونے والی عالمی ماحولیاتی کانفرنس میں بھارتی وزیر خارجہ سشما سوراج کی ہارٹ آف ایشیا کانفرس میں شرکت پر بات کی تھی ۔
اسلام آباد میں میڈیا سے گفتگو کرتے ہوئے سرتاج عزیز کا کہناتھا کہ پیرس میں ہونے والی ملاقات میں وزیر اعظم نواز شریف نے نریندر مودی سے سشما سوراج کی ہارٹ آف ایشیا کانفرنس میں شرکت پر بات کی تھی بھارتی وزیر اعظم نے پہلے قومی سلامتی کے مشیروں کی ملاقات پر زور دیا تھا، یہ بھی طے پایا کہ سیکرٹری خارجہ بھی ملاقات میں موجود ہونگے۔ کرکٹ سیریز سے متعلق کوئی بات نہیں ہوئی ،سیریز سے متعلق جلد جواب ملنے کی امید ہے تاہم ابھی حتمی طورپر کچھ نہیں کہہ سکتا۔پاکستان اور بھارت کے مذاکرات میںڈیڈلاک کافی حد تک دور ہوگیا ہے یہ کہنا قبل از وقت ہے کہ جامع مذاکرات کب شروع ہوں گے۔ سشما سوراج کل پاکستان آرہی ہیں بھارتی وزیر خارجہ سے کہتا ہوں کہ آپ کے منتظر ہیں۔
انہوں نے بتایا کہ افغان صدر 9 دسمبر کو پاکستان آرہے ہیں اور ہارٹ آف ایشیا کانفرنس میں شرکت کریں گے۔ افغان صدر سے افغان مفاہمتی عمل پر بھی بات ہوگی۔ہارٹ آف ایشیا کانفرنس کے موقع پر سائیڈ لائن ملاقاتیں بھی ہونگی۔
قبل ازیں ”ترقی میں کمیونٹی کا کردار“ کے موضوع پر ہونے والی کانفرنس سے مشیر خارجہ سرتاج عزیز نے خطاب کرتے ہوئے کہا کہ بینظیر انکم سپورٹ پروگرام 55 لاکھ افراد کو مالی معاونت فراہم کررہا ہے،ملک کی پائیدار ترقی میں کمیونٹی اہم کردار ادا کرتی ہے، کمیونٹی کو متحرک کرنے کیلئے اقدامات کی ضرورت ہے،پاکستان قدرتی آفات سے نمٹنے کیلئے منظم انداز میں کام کررہاہے ،موسمیاتی تبدیلیوں کے چیلنجز سے نمٹنے کیلئے بھی کام کیا جارہاہے،کمیونٹی کی شمولیت سے پاکستان ترقی کے اہداف حاصل کرلے گا ۔
واضح رہے کہ پیرس میں ہونے والی عالمی ماحولیاتی کانفرنس کے موقع پر بھارتی وزیر اعظم نریندر مودی نے شیڈول سے ہٹ کر پاکستان کے وزیر اعظم نواز شریف سے ملاقات کی تھی جو 2 منٹ سے زائد وقت تک جاری رہی تھی۔