کے ٹی ایچ واقے کی تحقیقات مکمل کر کے حقائق منظر عام پر لائے جائیں: محمود خان 

  کے ٹی ایچ واقے کی تحقیقات مکمل کر کے حقائق منظر عام پر لائے جائیں: محمود ...

  

 پشاور (سٹاف رپورٹر)وزیر اعلی خیبر پختونخوا محمود خان نے خیبر ٹیچنگ ہسپتال پشاور میں آکسیجن کی کمی سے مریضوں کی اموات کے واقعے کا سخت نوٹس لیتے ہوئے 48گھنٹوں کے اندر اندر واقعے کی تحقیقات مکمل کرکے رپورٹ پیش کرنے کی ہدایت کی ہے۔ اس واقعے کی اطلاع ملتے ہی وزیر اعلی نے صوبائی وزیر صحت تیمور سلیم جھگڑا اور چیف سیکرٹری خیبر پختونخوا ڈاکٹر کاظم نیاز سے رابطہ کرکے انہیں ہسپتال کے بورڈ آف گورنرز سے فوری طور پر واقعے کی تمام پہلوؤں سے تحقیقات کروانے کے احکامات جاری کیے۔ وزیر اعلی نے  48 گھنٹوں کے اندر واقعے کی تمام پہلوؤں سے صاف و شفاف تحقیقات مکمل کرکے رپورٹ پیش کرنے کی ہدایت کرتے ہوئے کہا ہے کہ مقررہ وقت میں رپورٹ پیش نہ ہونے کی صورت میں صوبائی حکومت اپنی طرف سے واقعے غیر جانبدار تحقیقات کروائے گی۔ واقعے کو انتہائی افسوسناک اور متعلقہ حکام کی طرف سے بہت بڑی غفلت کا مظاہرہ قرار دیتے ہوئے وزیر اعلی نے کہا کہ واقعے کی تمام پہلوؤں سے تحقیقات کروا کر ذمہ داروں کو تعین کیا جائے گا اور جو بھی اس واقعے کے ذمہ دار قرار پائے ان کے خلاف سخت کارروائی عمل میں لائی جائے گی۔ انہوں نے کہا کہ واقعے کی رپورٹ پبلک کی جائے گی اور معاملات کو عوام کے سامنے رکھا جائے گا۔ دریں اثناء وزیر اعلی نے اس افسوسناک واقعے میں جاں بحق ہونے والے افراد کے اہل خانہ سے دلی ہمدردی اور تعزیت کا اظہار کرتے ہوئے مرحومین کی مغفرت اور پسماندگان کے لئے صبر جمیل کی دُعا کی ہے۔ انہوں نے کہا کہ صوبائی حکومت متاثرہ خاندانوں کے غم میں برابر کی شریک ہے اور یقین دلاتی ہے کہ جلد سے جلد واقعے کی تحقیقات مکمل کرکے حقائق منظر عام پر لائے جائیں اور ذمہ داروں کے خلاف سخت کارروائی عمل میں لائی جائے گی۔

مزید :

صفحہ اول -