پی ڈی ایم کی وہ اکلوتی جماعت جو استعفوں کی حامی نہیں ہے
لاہور (ڈٰیلی پاکستان آن لائن) اپوزیشن کے اتحاد پی ڈی ایم میں شامل 11 میں سے 10 جماعتیں فوری استعفوں کی حامی ہیں تاہم پیپلز پارٹی اس تجویز کی مخالف ہے۔
نجی ٹی وی اے آر وائی نیوز نے ذرائع کے حوالے سے دعویٰ کیا ہے کہ پی ڈی ایم میں شامل 10 جماعتیں فوری طور پر استعفے دینے کی حامی ہیں۔ پیپلز پارٹی ابھی استعفوں کیلئے تیار نہیں ہے اور چاہتی ہے کہ مناسب وقت کا انتظار کیا جائے۔ سندھ حکومت کے ترجمان مرتضیٰ وہاب کا کہنا ہے کہ ابھی استعفوں کا کوئی فیصلہ نہیں ہوا۔
ذرائع کا کہنا ہے کہ منگل کو مولانا فضل الرحمان کی زیر صدارت پی ڈی ایم کا سربراہی اجلاس ہوگا جس میں لاہور جلسے کے انتظامات اور بینظیر بھٹو کی برسی کے معاملات زیر غور آئیں گے۔ اس کے علاوہ اسمبلیوں سے استعفے اور لانگ مارچ کے حوالے سے بھی تبادلہ خیال کیا جائے گا۔
