ٹرمپ کی پابندیوں کی مذمت، عالمی فوجداری عدالت نے ممبر ریاستوں سے متحد ہونے کی اپیل کردی

واشنگٹن (ڈیلی پاکستان آن لائن )عالمی فوجداری عدالت (آئی سی سی) نے امریکی پابندیوں کے خلاف تمام 125 ممبر ریاستوں کو متحد ہونے کی اپیل کردی۔ 
نجی ٹی وی "جیو نیوز" نے غیر ملکی خبر ایجنسی کے حوالے سے بتایا کہ عالمی فوجداری عدالت نے امریکی صدر ڈونلڈ ٹرمپ کی جانب سے عائد پابندیوں کی مذمت کی ہے۔
رپورٹ کے مطابق پابندیوں پر ردعمل دیتے ہوئے عالمی فوجداری عدالت نے اپنی تمام 125 ممبر ریاستوں کو دنیا بھرسے انصاف اوربنیادی انسانی حقوق کے لیے متحد ہونےکی اپیل کی۔ 
عالمی فوجداری عدالت نے انصاف کی فراہمی جاری رکھنے کے عزم کا اظہار کرتے ہوئے کہا کہ اپنے عملے کے ساتھ مضبوطی سے کھڑے ہیں۔
خیال رہے کہ گزشتہ سال عالمی فوجداری عدالت نے اسرائیلی وزیراعظم نیتن یاہو اور دیگر کے گرفتاری وارنٹ جاری کیے تھے جس کے جواب میں دوسری مرتبہ برسراقتدار آنے والے امریکی صدر ٹرمپ نے عالمی فوجداری عدالت پر ہی پابندیاں لگادیں۔