امریکی غلامی سے نجات ہی پاکستان کے تمام مسائل کا حل ہے، ساجد میر
لاہور(این این آئی)مرکزی جمعیت اہلحدیث پاکستان کے سربراہ سینیٹر پروفیسر ساجد میر نے کہا ہے امریکی غلامی سے نجات ہی پاکستان کے تمام مسائل کا حل ہے،مفادات کی خاطر امریکہ کو باپ بنا لینا کون سی حب الوطنی ہے؟۔ وہ مرکزی جمعیت اہلحدیث سعودی عرب کے امیر مولانا عبدالمالک مجاہد کی طرف سے ریاض میں منعقدہ استقبالیہ تقریب سے خطاب کررہے تھے۔ناظم اعلی حافظ عبدالکریم بھی ان کے ہمراہ تھے۔ پروفیسر ساجد میر نے کہا کہ ہمارے حکمرانوں کو ملک کی سلامتی کے تحفظ کی فکر کرنی چاہیے۔ ماضی گواہ ہے کہ امریکی مداخلت سے ہمیشہ علاقائی امن و سلامتی کے لئے سنگین خطرات پیدا ہوئے، کمزور اور غیر مثر خارجہ پالیسی کی وجہ سے پاکستان کے مسائل میں اضافہ ہو ا۔ انہوں نے کہا کہ قوم کو فرقہ وارانہ بنیادوں پر لڑانے کا غیر ملکی ایجنڈا کامیاب نہیں ہونے دیں گے۔اگر امریکہ ہی کے بس میں سب کچھ ہوتا تو ذوالفقار علی بھٹو سے لے کر نواز شریف تک ہمارے سیاسی رہنما نہ تو اسلامی سربراہی کانفرنس کا انعقاد کرپاتے، نہ ایٹمی پروگرام شروع ہوتا اور نہ ہی ایٹمی دھماکے ہوتے، ملک کو ایسے سیاست دانوں سے نجات دلانے کی ضرورت ہے جو امریکہ کی خوشنودی کیلئے ملکی مفاد کو بھی نظرانداز کر دیتے ہیں۔
ساجد میر