سلیم فارانی میموریل فٹ بال ٹورنامنٹ محرم الحرام کے باعث ملتوی
لاہور (سپورٹس رپورٹر)سلیم فارانی میموریل فٹ بال ٹورنامنٹ محرم الحرام کے باعث ملتوی کردیا گیا۔ گزشتہ روز ڈسٹرکٹ فٹ بال ایسوسی ایشن کے راجہ اشتیاق احمد نے بتایا کہ سلیم فارانی میموریل فٹ بال ٹورنامنٹ ڈسٹرکٹ فٹ بال ایسوسی ایشن کے زیر اہتمام 7 جولائی سے میونسپل سٹیڈیم راولپنڈی میں شروع ہونا تھا لیکن محرم الحرام کے باعث ملتوی کیا گیا ہے۔ ٹورنامنٹ کی نئی تاریخ کا اعلان آئندہ چند دنوں بعد کر دیا جائے گا۔ چیمپئن شپ میں راولپنڈی کی فٹ بال کلبوں کے رجسٹرڈ کھلاڑی حصہ لیں گے۔ ٹورنامنٹ میں ڈیپارٹمنٹ کے کھلاڑی حصہ نہیں لے سکیں گے۔ انہوں نے کہا کہ ٹورنامنٹ پی ایف ایف قوانین کے مطابق ناک آٹ سسٹم پر کھیلا جائے گا۔ٹورنامنٹ کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔ ٹورنامنٹ میں اچھی کارکردگی دکھانے والے کھلاڑیوں کا انٹر ڈسٹرکٹ فٹ بال چیمپئن شپ میں شرکت کے لئے انتخاب کیا جائے گا۔
