پلازمہ کے ذریعے کورونا مریضوں کی صحتیابی، فواد چودھری نے سوال اٹھا دیا
اسلام آباد (ویب ڈیسک) وفاقی وزیر سائنس و ٹیکنالوجی فواد چوہدری نے کورونا سے صحت یاب مریضوں کے پلازمہ (پیسو امیونائزیشن) سے کورونا کے مریضوں کی صحت یابی کے دعوو¿ں کو غیر مصدقہ قرار دے دیا۔
خیال رہے کہ ڈپٹی کمشنر اسلام آباد حمزہ شفقات نے ٹوئٹر پر ایک پوسٹ میں کورونا سے صحت یاب ہونے والے شہریوں سے اپیل کی تھی کہ وہ اپنا پلازمہ عطیہ کریں، کیوں کہ اس سے وینٹی لیٹر پر موجود کورونا سے شدید متاثر مریضوں کی جان بچائی جاسکتی ہے۔
فواد چوہدری نے ٹوئٹر پر ہی پلازمہ عطیہ کرنے سےمتعلق بیان پر ڈپٹی کمشنر اسلام آباد حمزہ شفقات پر تنقیدکرتے ہوئے کہا کہ ان کا یہ دعویٰ تحقیق سے ثابت نہیں۔فواد چوہدری کا کہنا تھا کہ حکومتی افسران کو اس طرح کے بیانات دینے میں احتیاط کرنی چاہیے، وزارت سائنس و ٹیکنالوجی اس قسم کے دعوؤں کو دیکھ رہی ہے،کورونا مریض کو پلازمہ لگانے سے صحت یابی کے دعوے غیر مصدقہ ہیں۔
There is no such reserach to back your claim, Govt officials must be very careful for making such observations....in @MinistryofST we are keeping track of int and local reserach such claims are unsubstantiated https://t.co/PmHILaPJqZ
— Ch Fawad Hussain (@fawadchaudhry) June 6, 2020
خیال رہے کہ نیشنل انسٹیٹیوٹ آف بلڈ ڈیزیز ( این آئی بی ڈی) کے سربراہ ڈاکٹر طاہر شمسی کی تجویز پر گذشتہ ماہ محکمہ صحت سندھ نے کورونا وائرس کے علاج کے لیے پیسیو امیونائزیشن کی اجازت دی تھی جب کہ دیگر صوبائی حکومتیں بھی اس کی اجازت دے چکی ہیں۔اس طریقہ کار میں کورونا وائرس سے صحت یاب ہونے والے شخص کے خون سے اینٹی باڈیز لے کر متاثرہ شخص میں داخل کی جاتی ہیں اور یہ تجربہ کار اینٹی باڈیز وائرس کے خلاف جنگ میں اس کی مدد کرتی ہیں۔
گذشتہ ماہ وزیر صحت سندھ ڈاکٹر عذرا پیچوہو نے ایک بیان میں کہا تھا کہ سندھ میں ڈاکٹروں کی کاوشوں سے پیسو امیونائزیشن کے مثبت نتائج آ رہے ہیں۔صوبائی وزیر صحت کا کہنا تھا کہ ابتدائی طور پر 11 کورونا کے مریضوں کو بذریعہ پلازمہ ٹریٹمینٹ دی گئی جن میں سے پہلے 3 مریض 9 ویں دن صحت یاب ہو کر گھر چلے گئے جب کہ 5 مریضوں کی حالت بہتر ہو رہی ہے۔
ڈاکٹر عذرا پیچوہو کا کہنا تھا کہ پیسو امیونائزیشن سے بڑی تعداد میں کورونا کے مریضوں کو وینٹی لیٹر پر جانے سے بچایا جا سکے گا، یہ ٹرائل بلڈ ٹرانسفیوڑن اتھارٹی کی نگرانی میں ہو رہا ہے، اور مکمل طور پر معیاری ضابطہ کار (ایس او پیز) کے ساتھ اس پر عمل کیا جا رہا ہے۔دوسری جانب کورونا سے صحت یاب ہونے والے گورنر سندھ عمران اسماعیل نے گذشتہ روز ہی اپنا پلازمہ عطیہ کیا ہے۔
I donated Plasma today, it was easy, no weakness or difficulty donating. It’s is our duty to save lives, Allah has given us opportunity. All those who r recovered from Covid must donate plasma. Thanks to Dr.Shamsi @62Shamsi pic.twitter.com/isPK1oEEpU
— Imran Ismail (@ImranIsmailPTI) June 5, 2020
گورنرسندھ کا کہنا تھا کہ پلازمہ عطیہ کرنا انتہائی آسان ہے، یہ ہمارا فرض ہے کہ اگر اللہ نے ہمیں موقع دیا ہے تو ہم اس کے ذریعے لوگوں کی جان بچائیں، اس لیے کورونا سے صحت یاب ہونے والے افراد ضرور اپنا پلازمہ عطیہ کریں۔