امریکہ ہماری آنکھوں کے سامنے  تباہ ہو رہا ہے، ٹرمپ کی نکتہ چینی

نارتھ کیرولینا(این این آئی)امریکہ کے سابق صدر ڈونلڈ ٹرمپ نے موجودہ صدر جوبائیڈن اور ان کی انتظامیہ پر کڑی نکتہ چینی کرتے ہو ئے کہا ہے کہ امریکہ ہماری آنکھوں کے سامنے تباہ ہو رہا ہے، امریکہ میں ہونیوالے وسط مدتی انتخابات امریکہ کی بقا کی جنگ کے مترادف ہیں۔ امریکی ریاست نارتھ کیرولینا میں ایک ہزار سے زائد افراد کے اجتماع سے خطاب کرتے ہوئے سابق صدر ڈونلڈ ٹرمپ نے کہا امر یکہ کی بقا کا انحصار ری پبلیکنز کو ہر سطح پر جتوانے پہ منحصر ہے جس کا آغاز آئندہ سال مڈ ٹرم الیکشن سے ہوگا۔ ہمارے پاس کوئی اور آپشن ہی نہیں، ہم اپنی آزادی کا دفاع کرنے جا رہے ہیں۔سابق صدر ٹرمپ نے فیس بک کی طرف سے ان کا اکاؤنٹ دو سال تک بند رکھنے کے اعلان کو رد کرتے ہوئے کہا یہ قطعی نا انصافی ہے کہ میرا اکاؤنٹ دو برس تک بند رہے گا۔ڈونلڈ ٹرمپ نے ایک مرتبہ پھر صدراتی الیکشن کو فراڈ قرار دیتے ہوئے کہا ڈیموکریٹس اور میڈیا کی کرپشن کی اس سے بڑی کوئی مثال نہیں ہو سکتی ہے۔ اگر آپ سمجھتے ہیں کہ لوگ نہیں جانتے تو میں بتاؤں کہ لوگ سب جانتے ہیں۔سابق امریکی صدر ڈونلڈ ٹرمپ نے آئندہ صدارتی انتخابات میں حصہ لینے کا تو کہا مگر اس حوالے سے کوئی حتمی اعلان نہیں کیا گیا۔
ٹرمپ