پاک فضائیہ کے اہل کاروں کی مہارت سے متاثر ہوا ہوں: صدر عارف علوی 

  پاک فضائیہ کے اہل کاروں کی مہارت سے متاثر ہوا ہوں: صدر عارف علوی 

  



کراچی(اسٹاف رپورٹر) صدر مملکت ڈاکٹر عارف علوی نے کہا ہے کہ ملکی فضائی سرحدوں کی نگرانی میں پاک فضائیہ کا کلیدی کردار ہے، میں فضائیہ کے اہل کاروں کی مہارت اور صلاحیت سے متاثر ہوا ہوں۔وہ بدھ کو پاک فضائیہ کی سونمیانی فائرنگ رینج میں منعقدہ تقریب سے خطاب کر رہے تھے، انھوں نے کہا کہ ملکی دفاع، سا  لمیت اور خود مختاری پر کوئی سمجھوتا نہیں کر سکتے، پاکستان پڑوسی ممالک کے ساتھ بھی اچھے تعلقات چاہتا ہے،ہماری مسلح افواج وطن عزیز کے دفاع کے لیے مکمل طور پر تیار ہیں۔صدر مملکت نے کہا کہ پیشہ ورانہ قابلیت، مہارت اور بہادری میں پاک فضائیہ کا مقابلہ نہیں، کامرہ میں ایوی ایشن سٹی کے قیام کے منصوبے کو سراہتا ہوں، پاک فضائیہ کے جوان پائلٹس نے اپنی صلاحیتوں کا لوہا منوایا، خطے کے کئی ممالک پاک فضائیہ کی صلاحیتوں کے معترف ہو چکے ہیں۔عارف علوی نے اس موقع پر کشمیر کا ذکر کرتے ہوئے کہا کہ حق خود ارادیت کا مطالبہ کشمیریوں کا بنیادی حق ہے، پوری دنیا نے بھارتی جارحیت پر پاکستان کے رد عمل کو سراہا ہے۔واضح رہے کہ پاک فضائیہ کے جنگی طیاروں نے سونمیانی میں فائر پاور کا مظاہرہ کیا، فائر پاور کا مقصد پاک فضائیہ کے جدید حربی صلاحیتوں کا عملی مظاہرہ تھا جب کہ فائر پاور میں پاک فضائیہ کے پائلٹس کو پیشہ ورانہ مہارت دکھانے کا موقع ملتا ہے۔فائرنگ رینج میں پاک فضائیہ کے کمانڈوز نے انسداد دہشت گردی کارروائی کا بھی مظاہرہ کیا، ایئر فورس کے لڑاکا طیاروں نے برق رفتاری سے اہداف کو نشانہ بنایا۔

مزید : صفحہ اول