عمران خان تاریخ کا اعلان کرینگے تو پورا ملک نکلے گا، یہ آخری کال ہوگی: گنڈاپور
پشاور (مانیٹرنگ ڈیسک،نیوز ایجنسیاں) صوبہ خیبرپختونخوا کے وزیراعلیٰ علی امین گنڈاپور نے کہا ہے کہ پاکستان تحریک انصاف کے بانی عمران خان تاریخ کا اعلان کریں گے تو پورا ملک نکلے گا، یہ آخری کال ہوگی سروں پر کفن باندھ کر نکلیں گے۔پشاور میں میڈیا سے گفتگو میں علی امین گنڈاپور کا کہنا تھاکہ گورنر سے ملاقات کا کوئی ایجنڈا نہیں تھا، وزیرکی حلف برداری کی تقریب میں غیررسمی ملاقات ہوئی۔انہوں نے کہا کہ 9 نومبر کو صوابی جلسے میں قراردادپیش کریں گے، عمران خان تاریخ کا اعلان کریں گے تو پورا ملک نکلے گا اور یہ آخری کال ہوگی سروں پر کفن باندھ کر نکلیں گے۔ان کا کہنا تھاکہ 9 نومبر کو صوابی جلسے میں پی ٹی آئی پر ہوئے ظلم سے متعلق قرار داد پیش کرنی ہے، قرار داد پیش کی جائے گی کہ بانی پی ٹی آئی کو بے گناہ جیل میں ڈالا گیا ہے، ڈھائی سال سے پی ٹی آئی کے ساتھ فسطائیت جاری ہے، ہمیں پرامن تحریک چلانے نہیں دی جارہی ہے۔وزیراعلیٰ کا کہنا تھاکہ صوابی جلسے میں مشترکہ طور پر بحیثیت صوبہ قرار داد پاس کریں گے اوربتایا جائے گا کہ جب بانی پی ٹی آئی فائنل کال دیں گے کیا تیاری کرنی ہے، فائنل کال کے بعد جب تک ہمارا حق نہیں ملتا تب تک کوئی واپس نہیں جائے گا، اس بار جب ہم نکلیں گے تو وہی بندہ آئے جو گھر بتاکر آئے کہ واپسی آزادی کے ساتھ ہی ہوگی۔انہوں نے بے نامی اثاثوں کی نشاندہی کرنے والوں کو 40 فیصد رقم دینے کا اعلان کیا اور کہاکہ اس اسکیم سے پٹواری زیادہ فائدہ اٹھائیں گے کیونکہ انہیں بے نامی زمینوں کا زیادہ پتہ ہوتا ہے۔
گنڈا پور
پشاور (مانیٹرنگ ڈیسک، نیوز ایجنسیاں) گورنر فیصل کریم کنڈی اور وزیراعلیٰ علی امین گنڈا پور کی کی گورنر ہاؤس میں ملاقات ہوئی۔وزیراعلیٰ کا گورنر ہاؤس پہنچنے پر گورنر نے پر تپاک استقبال کیا، امن و امان اور متعدد دیگر مسائل و حقوق کے معاملات پر تبادلہ خیال کیا گیا۔گورنر اور وزیراعلیٰ نے صوبہ کی معاشی ترقی کے لئے قیام امن اور وفاق سے قیام امن کے حوالہ سے مسائل کے حل کی مشترکہ کوششوں پر اتفاق کیا۔ملاقات میں سکیورٹی کے لئے دستیاب وسائل کے حصول کے لیے متحد ہوکر کوششیں کرنے کے عزم کا اظہار کیا گیا، صوبہ میں سیاحت کے فروغ اور عوامی دلچسپی کے دیگر امور پر بھی تبادلہ خیال کیا گیا۔اس موقع پر گورنر فیصل کریم کنڈی نے کہا کہ وفاق سے متعلق مسائل کے حل کے میں وفاقی حکومت سے رابطہ کروں گا، صوبہ کے وکیل کا کردار ادا کروں گا۔گورنر اور وزیراعلیٰ کی ملاقات صوبائی وزیر کی حلف برداری تقریب میں ہوئی۔
گورنر وزیر اعلیٰ ملاقات