ہیلمٹ کی خلاف ورزی پر موٹر سائیکل سوار کے15 چالان
لاہور(کرائم رپورٹر)ہیلمٹ کی مسلسل خلاف ورزیوں پر موٹرسائیکل سوار کو 30 ہزار روپے جرمانہ ہو گیا۔ٹریفک رولز کی خلاف ورزیوں پر ای چالان کا سلسلہ جاری ہے، ہیلمٹ کا استعمال نہ کرنا موٹرسائیکل سوار کے لئے امتحان بن گیا، اتنی قیمت موٹرسائیکل کی نہیں جتنے کا شہری آن لائن جرمانہ کروا بیٹھا۔شہری کو بغیر ہیلمٹ موٹرسائیکل چلانے پر دو،دو ہزار روپے کے 15ای چالان موصول ہوئے جس کے بعد موٹرسائیکل سوار کو 30ہزار روپے کا جرمانہ ہو گیا، شہری پرانے ماڈل کی بائیک استعمال کر رہا ہے جس کی قیمت 30 ہزار کے لگ بھگ ہو گی۔سی ٹی او لاہور عمارہ اطہر نے کہا ہے کہ آرٹیفیشل انٹیلی جنس سسٹم سے بلاتفریق کارروائیاں جاری ہیں، ٹریفک کی منظم روانی کیلئے شہریوں کو ٹریفک قوانین کا احترام کرنا ہو گا۔