پاک بحریہ نے آپریشن ”سومناتھ“ میں بہادری سے بھارتی ریڈ ار اسٹیشن تباہ کیا: امیر البحر 

      پاک بحریہ نے آپریشن ”سومناتھ“ میں بہادری سے بھارتی ریڈ ار اسٹیشن تباہ ...

  

  اسلام آباد (این این آئی)یوم دفاع پاکستان کے موقع پر سربراہ پاک بحریہ ایڈمرل ظفر محمود عباسی نے کہا ہے کہ پاک بحریہ کے جہازوں نے آپریشن ”سومناتھ“ کے دوران بے مثال بہادری سے دوارکا میں قائم بھارتی ریڈار اسٹیشن کو تباہ کیا،پاک بحریہ آج بھی دشمن کی سازشوں کا منہ توڑ جواب دینے کیلئے ہمہ وقت تیار ہے۔اتوار کو یوم دفاع پر اپنے پیغام میں ایڈمرل ظفر محمود عباسی نے کہاکہ چھ ستمبر کا دن ہماری تاریخ کا ایک سنہرا باب ہے۔یہ دن ہمیں پاکستانی قوم اور افواج کے غیر متزلزل عزم اور بہادری کی یاد دلاتا ہے۔یہ دن ہمارے شہداء اور غازیوں کی بے مثال بہادری اور قربانیوں کا غماز ہے جو دشمن کی عددی برتری کے باوجود ثابت قدم رہے اور اس کے ناپاک عزائم کو خاک میں ملا دیا۔ نیول چیف نے کہاکہ پاک بحریہ کی جراتمندانہ جنگی حکمت عملی اور پیشہ ورانہ قابلیت نے دشمن کو بچاؤ کی پالیسی اپنانے پر مجبور کیا۔پاک بحریہ کی آبدوز غازی نے بحر ہند میں اپنا تسلط قائم رکھتے ہوئے بھارتی بحری جنگی بیڑے کو بندرگاہ تک ہی مقید رکھا۔پاک بحریہ آج بھی دشمن کی سازشوں کا منہ توڑ جواب دینے کیلئے ہمہ وقت تیار ہے۔آج، پاک بحریہ کے تمام آفیسرز اور جوان ملکی بحری سرحدوں کے دفاع کیلئے اپنے عزم کو دہراتے ہیں تاکہ آنے والی نسلوں کیلئے ایک ترقی یافتہ اور پر امید مستقبل مہیا کیا جا سکے۔ 

امیر البحر 

مزید :

صفحہ آخر -