پارک میں تعینات ملازمین کی بہن کے دوست کو سمجھانے کیلئے آنیوالی لڑکی سے جنسی زیادتی

اسلام آباد (ڈیلی پاکستان آن لائن) وفاقی دارالحکومت کے پار ک بھی غیر محفوظ ہوگئے ، سی ڈی اے کے عملہ نے پارک میں آنیوالی لڑکی سے جنسی زیادتی کردی ،پولیس نے ایک ملزم کوگرفتار کرلیا ۔

جیو نیوز کے مطابق اسلام آباد کے پارک میں تعینات سی ڈی اے ملازمین نے لڑکی کے ساتھ مبینہ طور جنسی زیادتی کردی ، لڑکی کی درخواست پر تھانہ مارگلہ پولیس نے ایف آئی آر درج کرکے فوری کارروائی کرتے ہوئے ایک ملزم کو گرفتار کرلیاہے ۔لڑکی کی جانب سے دیئے گئے بیان کے مطابق اس نے اپنی بہن کے دوست کو سمجھانے کے لئے پارک میں بلایا تھا کہ سی ڈی اے ملازمین نے ان کوگھیر لیا اور غیر اخلاقی حرکات کرنے کا الزام لگا کر دھمکیاں دیں۔ ملازمین کا کہنا تھا کہ یہاں آنیوالے لڑکے اور لڑکیوں کو پولیس کے حوالے کیا جاتا ہے اور پھر 2000روپے رشوت لیکر جنگل کے راستے باہر جانے کاکہا ۔ جب وہ جنگل میں پہنچے تو وہاں ایک ملازم نے لڑکی کو پکڑ لیا ۔ ان نے لڑکی کو گارڈ اور دیگر ملازمین کے سامنے زیادتی کا نشانہ بنایا ۔ اس موقع پر ملازمین لڑکی کی جانب سے کسی کو بتانے پر اسے جان سے مارنے کی دھمکیاں دیتے رہے ۔