مانچسٹر ٹیسٹ کے تیسرے روز پاکستانی ٹیم مشکل میں پھنس گئی 

مانچسٹر (ڈیلی پاکستان آن لائن) پاکستان اور انگلینڈ کے درمیان اولڈ ٹریفورڈ مانچسٹر میں جاری پہلے ٹیسٹ کے تیسرے روز کے اختتام پر دوسری اننگز میں پاکستان کی بیٹنگ لائن ریت کی دیوار ثابت ہوئی۔صرف 137رنز پر 8کھلاڑی آوٹ ہو گئے ۔تیسرے روز کے آغاز میںشاہینوں نے عمدہ کارکردگی دکھاتے ہوئے انگلش ٹیم کو پہلی اننگز میں 219 رنز پر ڈھیر کر دیا ہے اور اسے 107 رنز کی برتری حاصل ہو گئی ۔ انگلینڈ نے 92 رنز 4 کھلاڑی آوٹ سے اننگز کا آغاز کیا تو شاداب خان نے 127 کے مجموعی سکور پر اولی پوپ کا شکار کر لیا جنہوں نے62 رنز بنائے۔ 159 کے مجموعی سکور پر جوز بٹلر بھی ہمت ہار بیٹھے اور 38 رنز بنا کر یاسر شاہ کی گیند پر کلین بولڈ ہو گئے۔ مجموعی سکور میں صرف 2 رنز کے اضافے کے بعد ڈومینک بیس بھی چلتے بنے، وہ 1 سکور بنا کر یاسر شاہ کی گیند پر اسد شفیق کے ہاتھوں کیچ ہوئے۔ 
170 کے مجموعی سکور پر انگلینڈ کی آٹھویں وکٹ بھی گر گئی اور کرس ووکس 19 رنز بنا کر یاسر شاہ کی گیند پر کلین بولڈ ہو گئے۔ انگلینڈ کو 9 ویں وکٹ کے نقصان کا سامنا جوفرا آرچر کی صورت میں برداشت کرنا پڑا جنہوں نے 16 رنز بنائے اور شاداب خان کی گیند پر محمد رضوان کے ہاتھوں کیچ ہوئے جبکہ آخری آوٹ ہونے والے کھلاڑی جیمز اینڈرسن ہیں جنہوں نے7 رنز بنائے اور شاداب خان کی گیند پر ایل بی ڈبلیو ہوئے۔ دیگر بلے بازوں میں روری برنز نے 4، ڈومینک سبلی نے 8، جو روٹ نے 14 رنز بنائے جبکہ بین سٹوکس کوئی سکور نہ بنا سکے۔ 
پاکستان کی جانب سے یاسر شاہ سب سے کامیاب باولر ٹھہرے جنہوں نے18 اوورز میں 66 رنز کے عوض 4 کھلاڑیوں کو پویلین کی راہ دکھائی جبکہ محمد عباس اور شاداب خان نے 2,2 وکٹیں حاصل کیں۔ فاسٹ باولر شاہین شاہ آفریدی اور نسیم شاہ ایک، ایک کھلاڑی کو آوٹ کرنے میں کامیاب ہوئے۔
دوسری اننگز میں پاکستان کے شان مسعود بغیر کوئی سکور بنائے آوٹ ہوئے ۔عابد علی 20،اظہر علی 18،بابر اعظم5،اسد شفیق 29،محمد رضوان 27،شاداب خان 15اور شاہین آفردیدی بغیر کوئی رن بنائے آوٹ ہوئے ۔اس وقت پچ پر یاسر شاہ اور محمد عباس موجود ہیں ۔انگلینڈ کی جانب سے براڈ ،سٹوکس اور واکس نے 2,2وکٹیں حاصل کیں جبکہ بیس نے ایک وکٹ حاصل کی ۔