پی اے سی کی چیئرمین شپ نہ ملی تو کسی کمیٹی میں نہیں جائینگے، فردوس شمیم

کراچی (این این آئی)پاکستان تحریک انصاف کے رہنما اور سندھ اسمبلی میں اپوزیشن لیڈر فردوس شمیم نقوی نے کہا ہے کہ سندھ اسمبلی میں اکثریت کی وجہ سے اپوزیشن کو نہیں سنا جاتا۔ پبلک اکاؤنٹس کمیٹی کی چیئرمین شپ نہیں دیں گے تو ہم نے کسی کمیٹی میں نہیں جانا۔ فردوس شمیم نقوی نے میڈیا سے گفتگو کرتے ہوئے کہا کہ جس پارٹی کا چیئرمین ہو اس کے ممبرز زیادہ ہوتے ہیں، قومی ہو یا صوبائی اسمبلی پبلک اکاؤنٹس کمیٹی کا چیئرمین اپوزیشن کا ہوتا ہے۔انہوں نے کہا کہ سندھ اسمبلی میں اپوزیشن کو اے پی سی کی چیئرمین شپ نہیں دی جارہی، دوسری طرف قومی اسمبلی میں شور کیا جا رہا ہے۔ پی اے سی نہیں دیں گے تو ہم نے کسی کمیٹی میں نہیں جانا۔ میں 3 جماعتوں کی طرف سے بات کر رہا ہوں۔فردوس شمیم نقوی نے کہا کہ پرائیویٹ ممبرز ڈے کو پیپلز پارٹی چلنے نہیں دیتی، سندھ اسمبلی میں اکثریت کی وجہ سے اپوزیشن کو نہیں سنا جاتا۔انہوں نے کہا کہ رمشا وسان قتل پر سندھ اسمبلی میں بحث کرنے کی اجازت نہیں دی گئی، منور وسان شاید اس میں ملوث ہیں۔ منور وسان جس طرح اسمبلی میں بھڑک اٹھے لگتا ہے وہ ملوث ہیں۔فردوس شمیم نے مزید کہا کہ تحریک انصاف کرپشن کے خلاف ہے وہ کسی کرپٹ بندے کا ساتھ نہیں دے گی، علیم خان پر ایک مقدمہ ہے جو ابھی ثابت نہیں ہوا۔
فردوس شمیم نقوی