ترکی اور شام میں ہلاکتوں کی تعداد 8 ہزار تک پہنچ گئی: شیری رحمٰن
اسلام آباد (ڈیلی پاکستان آن لائن) وفاقی وزیر برائے موسمیاتی تبدیلی شیری رحمٰن نے کہا ہے کہ ترکی اور شام میں ہلاکتوں کی تعداد 8 ہزار تک پہنچ گئی، ملبے میں دبے افراد کی تلاش اب بھی جاری ہے۔
نجی ٹی وی "جیو نیوز "کے مطابق سینیٹر شیری رحمٰن نے اپنے ٹویٹر بیان میں کہا ہے کہ ترکی اور شام میں زلزلے کے باعث ہلاکتوں کی تعداد تشویشناک حد تک بڑھ رہی ہے۔ ہلاکتوں کی تعداد 8 ہزار تک پہنچ گئی ہے جبکہ ملبے میں دبے افراد کی تلاش ابھی جاری ہے۔ ہمیں ترکیہ اور شام کے بھائی بہنوں کیلئے دلی ہمدردی ہے۔ پاکستان کے ہر شہری کا دل ترکیہ اور شام کیلئے افسردہ ہے.
انہوں نے کہا کہ ترکی نے حالیہ سیلاب کے دوران پاکستان حکومت اور سیلاب زدگان کی ہر لحاظ سے بھرپور مدد کی۔ پاکستان بھی اس مشکل صورتحال میں ترکی اور اس کی عوام کے ساتھ کھڑا ہے۔ سی 130 اور پی آئی اے کی امدادی پروازیں سامان اور امدادی ٹیمیں لے کر ترکی کے لیے روانہ ہو چکی ہیں۔
ان کا مزید کہنا تھا کہ ہمیں ترکی اور شام کے زلزلہ متاثرہ علاقوں میں اپنے بھائیوں اور بہنوں کے لیے ہنگامی امداد کا ایک مستقل ریلیف کا سلسلہ جاری رکھنا ہوگا۔ زلزلہ متاثر لوگوں کی مکمل بحالی تک امداد کا سلسلہ نہیں رکنا چاہئے۔ آئیے ترکی اور شام کے بھائی بہنوں کی امداد کو ایک قومی کاوش بنائیں۔
