الیکشن کمیشن کے آفس میں توڑ پھوڑ کا معاملہ، ملتان سے تحریک انصاف کے سابق ایم این اے گرفتار
ملتان(ڈیلی پاکستان آن لائن)الیکشن کمیشن کے دفتر میں توڑ پھوڑ کرنے کے الزام میں تحریک انصاف کے ایم این اے اور سابق چیف وہپ عامرڈوگرکو ملتان سے گرفتار کرلیا گیا ہے ۔
ملتان پولیس کی جانب سے عامر ڈوگر کے ڈیرے پر چھاپہ مارا گیا ، چھاپے کے دوران عامر ڈوگر کے علاوہ 12دیگر کارکنوں کو بھی گرفتا ر کرلیا گیا۔
تفصیلات کے مطابق آج تحریک انصاف کے رہنما عامر ڈوگر این اے 155کے ضمنی انتخابات کے لیے کاغذات نامزدگی جمع کرانے الیکشن کمیشن ملتان کے دفتر میں موجود تھے کہ اس دوران مسلم لیگ ن کے امیدوار شیخ طارق رشید بھی اپنے حامیوں کے ہمراہ وہاں پہنچ گئے ، اس موقع پر دونوں فریقین کی جانب سے ایک دوسرے کے خلاف نعرے بازی کے بعد پتھراﺅ شروع کردیا گیا جس کے باعث الیکشن کمیشن کے دفتر میں کھڑکیا ں وغیر ٹوٹ گئیں ۔ اس واقع کے بعدالیکشن کمیشن حکام کی جانب سے پولیس کو درخواست کی گئی تھی جس پر کارروائی کرتے ہوئے پولیس نے عامر ڈوگر کے ڈیرے پر چھاپہ مارا اور عامر ڈوگر کو 12کارکنوں سمیت گرفتا رکرلیا ۔ پولیس کا کہنا ہے کہ الیکشن کمیشن میں موجود تمام لوگوں کے خلاف کارروائی کی جائے گی ۔ الیکشن کمیشن کی درخواست پر پولیس نے توڑپھوڑ کرنے اور کارسرکار میں مداخلت کا مقدمہ درج کیا ہے ۔
