کراچی میں 2ہزارسے زائدسی سی ٹی وی کیمروں سے نگرانی کے اقدامات
کراچی (سٹاف رپورٹر)انتخابات کے دوران کراچی کے تین سرویلنس سینٹرمیں 252 مقامات پرکیمروں سے نگرانی کے اقدامات کیے گئے ہیں۔کراچی میں عام انتخابات کی تیاریاں عروج پرہیں، شہر کی سیکیورٹی ہائی الرٹ کردی گئی ہے۔ سی پی او میں کمانڈ اینڈ کنٹرول سسٹم سینٹرمیں پولیس کی مانیٹرنگ کا سلسلہ جاری ہے۔انچارج کمانڈ اینڈ کنٹرول سینٹرکے مطابق شہربھر میں دو ہزار سے زائد سی سی ٹی وی کیمرے کی مدد سے نگرانی کی جا رہی ہے۔ شہر کے تین سرویلینس سینٹر میں 252 مقامات پر 2032 کیمرے کی آنکھ موجود ہے۔سید سلمان حسین نے بتایا کہ سینٹرل پولیس آفس سمیت سوک سینٹر اور ڈی آئی جی ٹریفک آفس میں سرویلینس سینٹرموجود ہیں۔انچارج کمانڈ اینڈ کنٹرول سینٹرکے مطابق شہر میں سی سی ٹی وی کیمروں کی مدد سے کسی بھی ناخوشگوار صورتحال پر متعلقہ پولیس افسران کو ہدایت کی جاتی ہیں۔ ہدایات میں شہر میں فلاں مقام پر یہ واقعہ پیش آیا ہے فوری رپورٹ کی جائے۔اے آئی جی سید سلمان حسن نے کہا کہ ان سی سی ٹی وی کیمروں کی مدد سے گزشتہ سال شہر میں 250 سے زائد ناخوشگوار واقعات پر کارروائی کی گئی۔ عام انتخابات میں شہر میں مشکوک افراد کی نگرانی اور سیاسی سرگرمیوں پر بھی نظر رکھے ہوئے ہیں۔آئی جی سندھ راجہ رفعت مختارکا کہنا ہے کہ کمانڈ اینڈ کنڑول سینٹر کا سی سی ٹی وی مانیٹرنگ روم الیکشن کے دوران 24 گھنٹے چوکس رہے گا۔ میں خودکمانڈ اینڈ کنٹرول سسٹم سینٹرکی نگرانی کروں گا۔
