پاکستانی ٹیم متوازن، شائقین کو اچھی کرکٹ دیکھنے کو ملے گی، مچل سینٹنر

 لاہور (آئی این پی )نیوزی لینڈ کرکٹ ٹیم کے کپتان مچل سینٹنر نے کہا ہے کہ ٹرائی سیریز اور چیمپئنز ٹرافی کیلئے پاکستان کی ٹیم متوازن ہے، امید ہے شائقین کو اچھی کرکٹ دیکھنے کو ملے گی جبکہ   فخر زمان ہمارے لیے بڑا خطرہ ہوسکتے  ہیں۔

قذافی سٹیڈیم میں پریس کانفرنس کرتے ہوئے مچل سینٹنر کا کہنا تھا کہ ہم پاکستان کے ساتھ بہت زیادہ کرکٹ کھیل رہے ہیں ، ہم سیریز کیلئے اچھی تیاری کے ساتھ آئے ہیں ، چیمپئنز ٹرافی کی تیاری کیلئے ٹرائی سیریز بہت اہم ہے۔انہوں نے کہا کہ فخر زمان ہمارے لیے بڑا خطرہ رہے ہیں، ان کی وکٹ ہمارے لیے اہم ہوتی ہے، فخر زمان فاسٹ اور سپن بالرز دونوں کو اچھا کھیلتے ہیں، ہم پاکستان کی بالنگ لائن اپ سے ہم آہنگ ہیں کہ وہ کتنا خطرناک ہوسکتے ہیں۔

مچل سینٹنر کا کہنا تھا کہ ہماری ٹیم میں سینئر اور نوجوان کھلاڑیوں کا کمبی نیشن ہے ، ہم برصغیر میں اچھی کرکٹ کھیل رہے ہیں، اب بھی امید ہے اچھی کرکٹ کھیلیں گے ، چیمپئنز ٹرافی سے پہلے کراچی اور لاہور میں کھیلنے سے فائدہ ہوگا۔انہوں نے مزید کہا کہ میرا یہ پہلی مرتبہ لاہور کا دورہ ہے اور یہاں کی وکٹ کافی فلیٹ لگ رہی ہے، لاہور کا قذافی سٹیڈیم کرکٹ کھیلنے کیلئے ایک بہترین گرائونڈ ہے ، پاکستان کی ٹیم بہت ہی متوازن ٹیم ہے، امید ہے شائقین کو اچھی سیریز دیکھنے کو ملے گی۔