ظہیر خان نے پاکستان کو ہی چیمپئنز ٹرافی کی ٹاپ 4 ٹیموں سے باہر کردیا، وجہ بھی بتادی

ممبئی (آئی این پی )بھارت کے سابق ٹیسٹ کرکٹر اور ورلڈ کپ 2011 کی وننگ ٹیم کے رکن ظہیر خان نے میزبان پاکستان کو چیمپئنز ٹرافی کی ٹاپ فور ٹیموں سے باہر کر دیا  اور کہا ہے کہ بھارتی ٹیم سیمی فائنل میں باآسانی سے پہنچ جائے گی ۔

 مقامی ٹی وی کو انٹرویو دیتے ہوئے 46 سالہ سابق بھارتی ٹیسٹ کرکٹر نے بھارت، آسٹریلیا، جنوبی افریقا اور نیوزی لینڈ کو ٹاپ 4 ٹیموں میں جگہ دی جبکہ میزبان پاکستان اور انگلینڈ کی ٹیموں کو باہر نکال دیا۔انہوں نے کہا کہ اس میں کوئی شک نہیں کہ بھارتی ٹیم سیمی فائنل میں باآسانی سے پہنچ جائے گی۔

پاکستان کو ٹاپ فور میں نہ رکھنے کی وجہ بتاتے ہوئے سابق بھارتی کرکٹر کا کہنا تھا کہ پاکستان اس وقت مستقل کرکٹ نہیں کھیل رہا اور اسکواڈ میں واپس آنے والے فارم میں نہیں، اس لیے ان کی ٹاپ فور میں شمولیت مشکل ہے۔

ادھر ٹورنامنٹ کی دفاعی چیمپئن اور میزبان پاکستان کو نظر انداز کرنے پر شائقین کرکٹ نے ظہیر خان کو تنقید کا نشانہ بناتے ہوئے کہا کہ وہ بھارت کو منتخب کرکے اپنے ہندستانی ہونے کا ثبوت دے رہے ہیں۔