الیکشن 2024 کے لیے کوئی نام عمران خان کی طرف سے فائنل نہ کیے جانے کا انکشاف

اسلام آباد(آئی این پی )پی ٹی آئی  خیبرپختونخوا کے صدر جنید اکبرنے انکشاف  کیا  ہے  کہ الیکشن 2024 کے لیے کوئی نام بانی پی ٹی آئی نے فائنل نہیں کیا، ان کے نام پر کس نے لسٹیں فائنل کیں ،تحقیقات ہونی چاہئیں۔

ایک نجی ٹی وی کے پروگرا م میں  جنید اکبر نے  کہا کہ ہوسکتا ہے کچھ لوگ چاہتے ہوں میرے اور گنڈاپور کے درمیان اختلافات ہوں لیکن علی امین گنڈا پور اور میں ایک پیج پر ہوں یا نہیں لوگ بانی کیساتھ ہیں، لوگ میرے لیے نہیں بانی پی ٹی آئی کیلئے جلسے میں آئیں گے۔

جنید اکبر نے  انکشاف   کرتے ہوئے کہا کہ الیکشن 2024 کے لیے کوئی نام بانی پی ٹی آئی نے فائنل نہیں کیا، ہمیں بتایا گیا تھا ایم این ایز اور ایم پی ایز کے لیے نام بانی نے فائنل کیے لیکن میں نے جب بانی سے پوچھا تو انھوں نے جواب دیا میرے پاس کوئی لسٹ نہیں آئی۔ان کا کہنا تھا کہ بانی کے نام پر ایم این ایزاورایم پی ایزکی کس نے لسٹیں فائنل کیں، اس کی تحقیقات ہونی چاہئیں، بانی پی ٹی آئی کے پیغامات ملتے ہیں اور معلوم ہے کہ وہ کیا چاہتے ہیں، بیرسٹرگوہر یاکسی اورنے ابھی تک احتجاج سے متعلق بریف نہیں کیا۔

بشری بی بی سے متعلق سوال پر کے پی صدر نے کہا کہ بشری بی بی سے ایک ہی ملاقات 25 نومبر کی رات ہوئی تھی، بشری بی بی نے کہا کہ آپ نے میرے ساتھ ڈی چوک جانا ہے، جس پر بشری بی بی کو میں نے کہا کہ کوئی جائے یا نہیں ہم ساتھ جائیں گے۔رہنما پی ٹی آئی کا کہنا تھا کہ آج  صوابی جلسہ کے پی کی تاریخ کا بڑا جلسہ ہوگا، بانی پی ٹی آئی سے ملاقات کر کے مستقبل کا لائحہ عمل لوں گا، مجھے بانی پی ٹی آئی کے آشیرباد کی ضرورت ہے،عوام بانی کیساتھ ہیں۔

مذاکرات کے حوالے سے سوال پر انھوں نے کہا کہ سیاسی لوگوں کیساتھ ہمیں بیٹھنا چاہیے، جن کے پاس اختیار ہو، سب کہتے تھے حکومت کیساتھ بیٹھیں جبکہ ہم کہتے تھے یہ بے اختیار ہیں، ہم نے شروع سے کہا ان کیساتھ بیٹھیں گے، جس کے پاس اختیار ہوگا، ہم چاہتے ہیں کہ مذاکرات کے ذریعے مسائل کاحل نکلے اور عوام اور اداروں کے درمیان فاصلے کم ہوں۔