تحریک انصاف کے صوابی میں جلسے پر وزیر اطلاعات پنجاب عظمٰی بخاری کا رد عمل آ گیا
لاہور (ڈیلی پاکستان آن لائن) وزیر اطلاعات پنجاب عظمیٰ بخاری نے کہا ہے کہ صوابی کا جلسہ اشتعال انگیز تقاریر کے سوا کچھ نہیں تھا، کیونکہ خیبرپختونخوا کے عوام کو گزشتہ 12 سال میں صرف انتشار اور بدحالی ملی ہے۔ آج پاکستان کے عوام تعمیر و ترقی کا دن منا رہے ہیں، جبکہ ایک مخصوص سیاسی گروہ یومِ سیاہ منایا ہے،اس جماعت کے پاس رونے دھونے کے سوا کچھ نہیں بچا۔ خیبرپختونخوا میں برسوں کی حکومت کے باوجود عوام کو ایک بھی فلاحی منصوبہ نہیں دیا گیا، بلکہ صرف کرپشن اور مہنگائی کا تحفہ ملا۔ ان خیالات کا اظہار انہوں نے ڈی جی پی آر میں پریس کانفرنس کرتے ہوئے کیا۔
انہوں نے کہا کہ چند سال قبل ریاستی اداروں کے خلاف سازشیں کی جا رہی تھیں، اور مخالفین کو سیاسی انتقام کا نشانہ بنایا جا رہا تھا، مگر آج پنجاب میں مریم نواز کی قیادت میں عوام کو حقیقی ریلیف مل رہا ہے۔ پنجاب کے طلباء کو سکالرشپس، بجلی کے بلوں میں رعایت، خدمت کارڈ جیسی سہولت، اور اقلیتوں کے لیے مینارٹی کارڈ فراہم کیا گیا ہے۔پنجاب میں عوامی فلاح و بہبود کے بے شمار منصوبے شروع کیے گئے ہیں، جبکہ ایک ایسی جماعت بھی ہے جس کا مقدر صرف رونا دھونا ہے۔ یہ خود بھی روتے ہیں اور عوام کو بھی مایوسی میں مبتلا کرتے ہیں۔ وزیراعلیٰ مریم نواز خیبرپختونخوا اور بلوچستان کے طلباء کے لیے بھی سکالرشپس دیں گی، جبکہ ایک مخصوص گروہ صوابی میں جلسہ کر کے سرکاری وسائل کا بے دریغ استعمال کر رہا ہے۔
وزیر اطلاعات نے قذافی اسٹیڈیم میں ہونے والی شاندار تقریب کا ذکر کرتے ہوئے کہا کہ ہمارے بچوں کو صحت مند تفریحی سرگرمیوں کی ضرورت ہے، نہ کہ پٹرول بموں کی۔وزیراعلیٰ پنجاب مریم نواز خود اسٹیڈیم میں سیکیورٹی انتظامات کی نگرانی کر رہی ہیں، جبکہ ماضی میں ان مقامات کو ذاتی سیاست کے لیے استعمال کیا جاتا رہا۔کھیلوں کے میدان آباد ہونے چاہئیں تاکہ نوجوانوں کو مثبت سرگرمیوں کے مواقع مل سکیں۔
عظمیٰ بخاری نے مزید کہا کہ علی امین گنڈاپور کو بتانا چاہیے کہ تحریک فساد نے خیبرپختونخوا کے عوام کے لیے اب تک کیا کیا؟ مسلم لیگ (ن) کی حکومت تمام صوبوں کی ترقی چاہتی ہے، لیکن کچھ لوگ صوبے کے وسائل کو ذاتی فائدے کے لیے استعمال کر رہے ہیں۔ بانی پی ٹی آئی کی کال پر کوئی باہر نہیں نکلا، حتیٰ کہ ان کے اپنے ایم این ایز اور ایم پی ایز بھی گھروں میں بیٹھے رہے، کیونکہ عوام کو ان کے دھرنوں اور احتجاج میں کوئی دلچسپی نہیں ہے۔پورے ملک میں انتخابات کو غلط قرار دینے والے خیبرپختونخوا کے نتائج کو درست کیسے مان رہے ہیں؟ حقیقت یہ ہے کہ وزیراعلیٰ مریم نواز نے محض 1 سال میں اتنا کام کیا جتنا بعض حکومتیں 5سال میں بھی نہیں کر پاتیں۔ "نگہبان رمضان پیکیج"کے تحت 10 ہزار روپے مستحق خاندانوں کو دیئے جائیں گے، جس کی رجسٹریشن کی آخری تاریخ 15 فروری مقرر کی گئی ہے۔ اس پیکیج کے تحت امداد مستحقین کے گھروں تک پہنچائی جائے گی۔
انہوں نے واضح کیا کہ وزیراعلیٰ مریم نواز کسی مخصوص جماعت کے لیے نہیں بلکہ تمام مستحق افراد کے لیے منصوبے بناتی ہیں۔ بینکوں کے ساتھ تمام معاملات طے پا چکے ہیں، اور کسی بھی بینک سے پے آرڈر کیش کرایا جا سکتا ہے۔
عظمیٰ بخاری نے مزید کہا کہ عالمی ادارے پاکستان کی معیشت میں بہتری کی تصدیق کر رہے ہیں، جبکہ کچھ عناصر منفی پروپیگنڈے میں مصروف ہیں۔ گورنر پنجاب سے متعلق سوال پر انہوں نے کہا کہ وہ ہمیشہ ناراض ہی رہتے ہیں، اس پر کوئی تبصرہ نہیں کرنا چاہتی، مگر عوام کے مسائل حل ہو رہے ہیں، اسی لیے کوئی احتجاج میں شریک نہیں ہو رہا۔ آج کا دن تعمیر و ترقی کا دن ہے، اس لیے منفی سیاست نہیں ہونی چاہیے۔ وزیراعلیٰ مریم نواز ایک ذمہ دار رہنما کے طور پر نوجوانوں کو انتشار سے محفوظ رکھنا چاہتی ہیں۔ رمضان بازار ہر ضلع میں لگائے جائیں گے، جہاں عوام کو سبسڈی پر اشیائے ضروریہ دستیاب ہوں گی۔
آخر میں وزیر اطلاعات نے کہا کہ جب ہم نے حکومت سنبھالی تو مہنگائی 38 فیصد تھی، جو آج 4 فیصد پر آ چکی ہے۔ ہم جھوٹے دعوے نہیں کرتے، بلکہ وہ وعدے کرتے ہیں جن پر عملدرآمد ممکن ہو۔
