بلائنڈ کرکٹ ورلڈ کپ ، پاکستان اور بنگلہ دیش افتتاحی میچ میں آج مدمقابل
لاہور/عجمان(سپورٹس رپورٹ،ایجنسیاں) پانچویں بلائنڈ کرکٹ ورلڈ کپ کا آغاز آج پاکستان اور متحدہ عرب امارات (یو اے ای) میں بیک وقت ہوگا جبکہ بھارتی ٹیم کے فائنل میں پہنچنے اور اسے فائنل کھیلنے کیلئے پاکستان آنے کی این او سی جاری نہ ہونے پر بلائینڈ ورلڈ کا فائنل 19جنوری کو شارجہ میں کھیلا جائیگا۔ دوسری صورت میں ایونٹ کا فائنل21جنوری کو لاہور کے قذافی سٹیڈیم میں کھیلا جائیگا۔تفصیلات کے مطابق آج افتتاحی میچ پاکستان اور بنگلہ دیش کے درمیان قذافی سٹیڈیم لاہور میں کھیلا جائیگا جبکہ بھارت اور آسٹریلیا کی ٹیمیں عجمان اوول کرکٹ گراؤنڈ میں مد مقابل ہونگی۔ پاکستان اور نیپال کی ٹیمیں جناح سٹیڈیم گوجرانوالہ میں 9جنوری کو مد مقابل ہونگی جبکہ اسی روز آسٹریلیا اور سری لنکا کے درمیان عجمان اوول کرکٹ گراؤنڈ میں میچ کھیلا جائیگا۔ 10جنور ی کو بنگلہ دیش اور نیپال کی ٹیمیں اقبال سٹیڈیم فیصل آباد میں نبرد آزما ہونگی ، اسی روز بھارت اور سری لنکا کے درمیان عجمان اوول کرکٹ گراؤنڈمیں میچ کھیلا جائیگا۔ 11جنوری کو کوئی میچ نہیں کھیلا جائیگا تاہم اسی روز پاکستان ، نیپال اور بنگلہ دیش کی ٹیمیں میچوں کیلئے متحدہ عرب امارات روانہ ہونگی۔ 12جنوری کو بھارت اور پاکستان کے درمیان عجمان اوول کرکٹ گراؤنڈ میں میچ کھیلا جائیگا اسی روز بنگلہ دیش اور آسٹریلیا کی ٹیمیں ایم سی سی گراؤنڈ عجمان میں آمنے سامنے ہونگی۔ 13جنور ی کو نیپال اور سری لنکا کی ٹیمیں عجمان اوول کرکٹ گراؤنڈمیں نبرد آزما ہونگی۔ اسی روز بھارت اور بنگلہ دیش کے درمیان میچ ایم سی سی گراؤنڈ عجمان میں کھیلا جائیگا۔ 14جنور ی کو بھارت اور نیپال کی ٹیمیں ایڈن گارڈن کرکٹ گراؤنڈ عجمان میں آمنے سامنے ہونگی ، اسی روز سری لنکا اور بنگلہ دیش کے درمیان میچ عجمان اوول کرکٹ گراؤنڈمیں کھیلا جائیگا۔ نیپال اور آسٹریلیا کے درمیان میچ ایم سی سی کرکٹ گراؤنڈ عجمان میں 15جنوری کو کھیلا جائیگا جبکہ اسی روز پاکستان اور سری لنکا کی ٹیمیں ایڈین گارڈن کرکٹ گراؤنڈ عجمان میں مد مقابل ہونگی۔ 16جنوری کو ورلڈ میں آرام کا دن ہوگا ، میگا ایونٹ کے سیمی فائنل مرحلے کا آغاز 17جنوری سے شروع ہوگا ۔ پہلا سیمی فائنل 17جنوری کو ورلڈ کی پہلی اور چوتھی نمبر پر آنے والی ٹیموں کا میچ عجمان اوول کرکٹ گراؤنڈ میں کھیلا جائیگا ۔ دوسرے سیمی فائنل میں دوسری اور تیسری پوزیشن حاصل کرنے والی ٹیمیں 18جنوری کو ایم سی سی گراؤنڈ عجمان میں آمنے سامنے ہونگی۔
