”انگلینڈ میں پاکستانی فاسٹ باﺅلرز ناکام ہو سکتے ہیں کیونکہ۔۔۔“ جنید خان نے پریشان کن بات کہہ دی

”انگلینڈ میں پاکستانی فاسٹ باﺅلرز ناکام ہو سکتے ہیں کیونکہ۔۔۔“ جنید خان نے ...
”انگلینڈ میں پاکستانی فاسٹ باﺅلرز ناکام ہو سکتے ہیں کیونکہ۔۔۔“ جنید خان نے پریشان کن بات کہہ دی

  

لاہور (ڈیلی پاکستان آن لائن) پاکستان کرکٹ ٹیم کے فاسٹ باﺅلر جنید خان کو انگلینڈ میں پاکستانی فاسٹ باﺅلرز کی ناکامی کا خدشہ ستانے لگا ہے جن کا کہنا ہے کہ گیند پر تھوک کے استعمال کو روکنے سے ریورس سوئنگ مشکل ہو گی جس کے باعث کھلاڑیوں کی کارکردگی بھی متاثر ہو گی۔

تفصیلات کے مطابق نجی خبر رساں ادارے کو دئیے گئے انٹرویو میں جنید خان کا کہنا تھا کہ گیند پر تھوک کا استعمال روکنے کی وجہ سے ریورس سوئنگ نہیں ہو گی، اس سے دونوں ٹیموں کے فاسٹ باﺅلرز کی کارکردگی پر فرق پڑے گا لیکن زیادہ مشکلات پاکستانی باﺅلرز کیلئے ہوں گی کیونکہ جیمز اینڈرسن نئی گیند اچھی کرتے ہیں البتہ ان کی ریورس سوئنگ زیادہ موثر نہیں، اس معاملے میں سٹورٹ براڈ اور جوفرا آرچر بھی مہمان باﺅلرز سے پیچھے ہیں۔

انہوں نے کہا کہ محمد عباس کی رفتار 125کلومیٹر فی گھنٹہ لیکن ایشیاءمیں بھی وہ ریورس سوئنگ سے وکٹیں حاصل کرتے رہے ہیں، شاہین شاہ آفریدی بھی مناسب مہارت رکھتے ہیں جبکہ نسیم شاہ نے مختصر کیریئر میں زیادہ تر شکار ریورس سوئنگ کی بدولت ہی کئے، محمد موسیٰ سمیت نوجوان باﺅلرز کو انگلش کنڈیشنز کا تجربہ نہیں ِ، اس لئے بھی وہاں اچھا پرفارم کرنا آسان نہیں ہوگا۔

جنید خان نے کہا کہ دورہ انگلینڈ کیلئے منتخب باﺅلرز سے زیادہ تجربہ ہونے کے باوجود مجھے نظر انداز کردیا گیا جس پر بے حد مایوسی ہوئی، محمد عباس کے سوا موجودہ سکواڈ میں شامل کسی پاکستانی باﺅلرز کی اوسط یا سٹرائیک ریٹ مجھ سے بہتر نہیں، میں نے انڈر 19ٹیم کے ساتھ انگلینڈ کا دورہ کیا، 6سال کاﺅنٹی کرکٹ کھیلی اور چیمپینز ٹرافی میں بھی عمدہ کارکردگی کا مظاہرہ کیا،میں ٹی ٹوئنٹی کرکٹ میں جیمز فالکنر کے بعد لنکاشائر کا کامیاب ترین غیر ملکی باﺅلرز ہوں لیکن پھر بھی منتخب نہ ہو سکا۔

ایک سوال کے جواب میں ان کا کہنا تھا کہ میں محمد عامر سے حسد نہیں کرتا لیکن فاسٹ باﺅلرز کو 14 یا 15ون ڈے میچز میں ناقص کارکردگی کے باوجود مینجمنٹ نے تسلسل کے ساتھ مواقع دئیے البتہ میں ان کے مقابلے میں اتنا خوش قسمت نہیں تھا کیونکہ 2 میچز کے بعد ہی ڈراپ کردیا گیا۔

مزید :

کھیل -