ہسپتالوں کے میڈیکل سپرنٹنڈنٹس اوپن ڈور پالیسی پر عمل کریں،جمال ناصر
لاہور (جنرل رپورٹر)وزیر پرائمری و سیکنڈری ہیلتھ کیئر و بہبود آبادی ڈاکٹر جمال ناصر نے ہدایت کی ہے کہ تمام ڈسٹرکٹ ہیڈکوارٹر ہسپتالوں کے میڈیکل سپرنٹنڈنٹس اوپن ڈور پالیسی پر عمل کریں اور مریضوں کے لئے اپنے دروازے ہمیشہ کھلے رکھیں۔ سرکاری ہسپتال کروڑوں غریب شہریوں کے علاج معالجے کے لئے بنائے گئے ہیں، چند لوگوں کو نوکریاں دینا ہی مقصد نہیں۔ تمام میڈیکل سپرنٹنڈنٹس روزانہ کم از کم ایک گھنٹہ اپنے ہسپتال کا تفصیلی وزٹ کریں اور مریضوں سے مل کر ان کے مسائل معلوم کریں۔سرکاری ہسپتالوں میں مریضوں کے ضروری ٹیسٹوں کے لئے مشینری دستیاب ہے، خراب مشینیں بلا تاخیر ٹھیک کروائی جائیں۔وزیر اعلیٰ محسن نقوی کے ویڑن کے تحت تمام وزراء ہیلتھ کیئر سسٹم کی بہتری پر خصوصی توجہ دے رہے ہیں اور ہسپتالوں میں علاج معالجے کی سہولتیں بہتر کرنے کے لئے دن رات کام کیا جا رہا ہے۔
تمام ہسپتالوں میں پنکھے، ائر کنڈیشنر، لائٹیں، ایگزاسٹ فین، واٹر کولر وغیرہ فنکشنل رکھے جائیں۔وہ گزشتہ روز پنجاب کے ڈسٹرکٹ ہیڈکوارٹر ہسپتالوں کے میڈیکل سپرنٹنڈنٹس کی ماہانہ کانفرنس سے خطاب کر رہے تھے۔سیکرٹری ہیلتھ علی جان خان کی زیر صدارت اجلاس میں ہسپتالوں کی ماہانہ کارکردگی کا جائزہ لیا گیا۔جس میں صوبے بھر کے 26 ڈسٹرکٹ ہیڈکوارٹر ہسپتالوں کے میڈیکل سپرنٹنڈنٹس شریک ہوئے۔کانفرنس میں سپیشل سیکرٹری ہیلتھ فاطمہ شیخ،ایڈیشنل سیکرٹری خضرافضال، راشد ارشاد اور ڈائریکٹر جنرل ہیلتھ ڈاکٹر الیاس گوندل نے شرکت کی۔
