خیبر پختونخوا میں 411 آسامیوں کے لیے ٹیسٹ، اتنے امیدوار پہنچ گئے کہ انتظامیہ بھی پریشان

پشاور(ڈیلی پاکستان آن لائن) اکاؤنٹنٹ جنرل خیبر پختونخواکےدفاتر میں411اسامیوں کے لیے تحریری ٹیسٹ ہوا جس میں ایک لاکھ 50 ہزار امیدواروں نےشرکت کی۔

ایکسپریس نیوز کے مطابق اکاؤنٹنٹ جنرل خیبر پختونخوا دفاتر میں جونیئر آڈیٹر، ڈیٹا انٹری آپریٹر، آپر ڈویژن کلرک، لوئر ڈویژن کلرک اور اسٹینو ٹائپسٹ کی 411 اسامیوں پر تقرری کے لیے ایک لاکھ 50 ہزار امیدواروں نے درخواستیں جمع کرائیں۔ان امیدواروں کے لیے اکاؤنٹنٹ جنرل خیبر پختونخوا کی طرف سے پشاور میں ٹیسٹ کا انعقاد کیا گیا۔ تعداد بہت زیادہ ہونے کے سبب ان امیدواروں کے ٹیسٹ مرحلہ وار  لیے گئے۔ امیدواروں کا تعلق پورے صوبے کے اضلاع سے تھا۔اکاؤنٹنٹ جنرل خیبر پختون خوا ڈاکٹر اکبر علی خان نے تمام ٹیسٹ کی خود نگرانی کی۔ اس موقع پر ان کا کہنا تھا کہ  ٹیسٹ کی شفافیت کے لیے ہر قسم کے انتظامات کیے گئے تاکہ امیدواروں کو ان کا جائز حق دیا جا سکے۔