ماڈل ایان علی کا ضمانت کیلئے لاہور ہائیکورٹ سے رجوع کرنے کا فیصلہ
راولپنڈی(اے این این)منی لانڈری کیس میں گرفتار ماڈل ایان علی کی وکیل نے اپنی موکلا کی ضمانت کے لئے لاہور ہائی کورٹ کے راولپنڈی بنچ میں درخواست دائر کرنے کا فیصلہ کرلیا ۔ راولپنڈی کی کسٹم عدالت میں تیسری بار ضمانت کی درخواست خارج ہونے پر ایان علی کو پریشانی لاحق ہوگئی ہے۔ ماڈل کی خواہش پر ان کی خاتون وکیل شائستہ وہاب نے اڈیالہ جیل میں ان سے ملاقات کی، اس دوران ماڈل کا رویہ انتہائی سخت تھا اور وہ ضمانت نہ ہونے پر سخت پریشان اور غصے میں نظر آرہی تھیں، ملاقات کے دوران ایان علی نے اپنی وکیل پر واضح کیا کہ وہ رمضان المبارک سے قبل جیل سے باہر آنا چاہتی ہے۔ جس پر ان کی وکیل نے کسٹم عدالت کی جانب سے ملزمہ کی ضمانت مسترد کئے جانے کے فیصلہ کی مصدقہ کاپی حاصل کرلی ہے، آئندہ 2 روز میں لاہور ہائی کورٹ کے راولپنڈی بینچ میں ان کی ضمانت کی درخواست دائر کی جائے گی۔