محکمہ زراعت پنجاب کی کاشتکاروں کو گوارے کی فصل کی کاشت فوری شروع کرکے وسط جولائی تک مکمل کرنے کی ہدایت

محکمہ زراعت پنجاب کی کاشتکاروں کو گوارے کی فصل کی کاشت فوری شروع کرکے وسط ...

راولپنڈی (این این آئی)محکمہ زراعت پنجاب نے کاشتکاروں کو گوارے کی فصل کی کاشت فوری شروع کرکے وسط جولائی تک مکمل کرنے کی ہدایت کرتے ہوئے کہاہے کہ کاشتکار بروقت گوارے کی کاشت مکمل کرلیں تاہم بیج والی فصل کی کاشت یکم جولائی سے شروع کرکے 30جولائی تک بھی مکمل کی جاسکتی ہے ۔ ترجمان نے ایک بیان میں کہاکہ گوارے کی کاشت کیلئے گرم آب وہوا کی ضرورت ہوتی ہے ٗ فصل پانی کی کمی کو کافی دیر تک برداشت کرنے کی صلاحیت رکھتی ہے ۔انہوں نے کہاکہ کاشتکار گوارے کی منظور شدہ اقسام بی آر 90 اور بی آر 99 کاشت کرکے اچھی فصل حاصل کرسکتے ہیں۔

انہوں نے کہاکہ چارے کیلئے بیج کی شرح 20 سے 25کلوگرام فی ایکڑ جبکہ بیج والی فصل کیلئے شرح 12 سے 15کلوگرام فی ایکڑ رکھنی چاہیے۔ انہوں نے بتایاکہ چونکہ گوارہ ایک پھلی دار فصل ہے لہٰذااس کو زیادہ کھاد کی ضرورت نہیں ہوتی البتہ اگربوقت کاشت ایک بوری ڈی اے پی اور پھول بنتے وقت آدھی بوری یوریا فی ایکڑ ڈال لی جائے تو شاندار فصل حاصل ہوسکتی ہے۔

مزید : کامرس