کیسا لمحہ ہے درمیاں خاموش ۔۔۔میں یہاں اور تو وہاں خاموش
کیسا لمحہ ہے درمیاں خاموش
میں یہاں اور تو وہاں خاموش
خون کو چھان کر نکالا گیا
اشک بے رنگ، بے زباں، خاموش
موت نے شہرتیں فراہم کیں
زندگی کی تھی داستاں خاموش
ضبط کیسے نمو پکڑتا ہے ؟
کیسے رہتی ہیں سسکیاں خاموش ؟
کیا ہواؤں نے بانٹ دی خیرات ؟
کیوں چراغوں کا ہے دھواں خاموش
کب مقدر میں حادثوں کے فراغ
کب گزرتے ہیں کارواں خاموش
تتلیاں ہیں دریدہ لب ساری
دشت لگتا ہے گلستاں خاموش
ضرب ِ محشر کی زد پہ ہے دھرتی
اور عباس آسماں خاموش
کلام :حیدر عباس
