لاہور(ڈیلی پاکستان آن لائن)قومی کرکٹ ٹیم کےسابق کپتان سلمان بٹ نے کہا ہےکہ حارث رؤف وہ بچہ ہے جو اپنی فیلڈ دیکھے بغیر گیند کرواتا ہے، آخری اوور میں حارث کا مڈ آف سر کل کے اندر ہے، اس کے باوجود حارث نے آخری بال فل بال کروائی اور چوکا لگ گیا اس کے بعد سب نے دیکھا کہ کپتان حارث پر چیخے بھی کہ میں آگے کھڑا ہوا ہوں۔
سلمان بٹ نے حارث رؤف کو واضح کرتے ہوئے کہا کہ آپ کو پتا ہونا چاہیے جب آپ مڈ آف اوپر لیتے ہیں تو آپ فل بال نہیں کھیلتے، یہ کرکٹ کی بنیادی باتیں ہیں لیکن حارث کا سٹائل ہے گیند پر رنز کھانے کے بعد وہ بیٹھ جاتا ہے سر پر ہاتھ رکھ لیتا ہے جیسے اس کے شیئرز کا نقصان ہوگیا ہو یا کوئی چیز چوری ہوگئی ہو، مجھے سمجھ نہیں آتا وہ یہ سب کرکے کیا ظاہر کرنا چاہتا ہے، یہ غیر پیشہ ورانہ ہے، ایسا لگتا ہے کہ جیسے آپ کچھ سیکھنا نہیں چاہتے۔
سلمان بٹ نے مزید کہا کہ امریکہ کی ٹیم نئی ٹیم ہے آپ نے اس ٹیم کو ایک باؤنسر نہیں مارا، اتنی بڑی باؤنڈری پر بھی آپ نے اس ٹیم کو باؤنسر نہیں مارا؟ آپ نے انہیں محسوس ہی نہیں کروایا کہ آپ ان پر اٹیک کرنے جارہے ہیں، فیلڈنگ آپ نے کسی عام میچ کی طرح سیٹ کی ہوئی تھی جس کی وجہ سے کیچ چھوٹ گئے، ایک کیچ افتخار کے پاس سے گزرا دوسرا کیچ آگے گرگیا کیوں کہ فیلڈر وہاں کیپر سے بھی پیچھے کھڑا تھا۔ سمجھ نہیں آرہا کہ ہمیں ٹیم کی کس کس بات پر تنقید کرنی چاہیے، کیوں کہ یہ میچ غلطیوں سے بھرا ہوا تھا۔