1962 میں لاپتہ ہونے والی خاتون 6 دہائیوں بعد زندہ سلامت مل گئی
واشنگٹن (ڈیلی پاکستان آن لائن) امریکی ریاست وسکونسن سے 1962 میں لاپتہ ہونے والی آڈری بیک برگ جو اب 82 سال کی ہیں، بالآخر زندہ اور صحت مند دریافت ہو گئی ہیں۔ ساوک کاؤنٹی شیرف آفس نے تصدیق کی ہے کہ آڈری اپنی مرضی سے گھر چھوڑ کر چلی گئی تھیں اور ان کے ساتھ کوئی مجرمانہ حرکت یا تشدد نہیں ہوا تھا۔
فوکس نیوز کے مطابق 20 سال کی عمر میں آڈری 7 جولائی 1962 کو اپنے گھر سے غائب ہو گئی تھیں۔ خاندانی بےبی سٹر نے بتایا تھا کہ انہوں نے آڈری کے ساتھ مدیسون تک ہچ ہائیک کیا، جہاں سے دونوں نے انڈیاناپولس کے لیے بس پکڑی۔ بےبی سٹر کا کہنا تھا کہ بس سٹاپ سے آڈری کونے پر چلی گئیں اور پھر کبھی واپس نہیں آئیں۔
چارلی پراجیکٹ کے مطابق آڈری کی شادی 15 سال کی عمر میں رونالڈ بیک برگ سے ہوئی تھی جو ایک مشکل رشتہ تھا اور اس میں بدسلوکی کے الزامات بھی تھے۔ تاہم رونالڈ نے پولیس کے پولی گراف ٹیسٹ میں کامیابی حاصل کی تھی۔
ساوک کاؤنٹی شیرف آفس نے اس پرانے کیس کو اس سال دوبارہ کھولا تھا، جس میں تمام ثبوتوں اور گواہوں کے بیانات کا ازسرِنو جائزہ لیا گیا۔ تحقیقات سے پتہ چلا کہ آڈری نے اپنی مرضی سے گھر چھوڑا تھا اور اب وہ کسی دوسری ریاست میں رہ رہی ہیں۔ ان کے خاندان کا اصرار تھا کہ وہ اپنے بچوں کو کبھی نہیں چھوڑ سکتی تھیں، لیکن حقیقت اس کے برعکس نکلی۔
