پاکستان کرکٹ ٹیم کے مینٹور "میتھیو ہیڈن "کو پاکستانی ٹیم کی بڑے میچوں میں شاندار واپسی بھا گئی
سڈنی(ڈیلی پاکستان آن لائن ) پاکستان کرکٹ ٹیم کے مینٹورسابق آسٹریلوی کرکٹر میتھیو ہیڈن کا کہنا ہے کہ پاکستان کرکٹ ٹیم کی خاص بات جو مجھے بھاتی ہے وہ ان کی بڑے میچوں میں شاندار واپسی ہوتی ہے۔
پریس کانفرنس کرتے ہوئےمیتھیو ہیڈن کا کہنا تھا کہ بابر اعظم ایک سپیشل پلیئر ہے،گلکرسٹ کا بھی2007 ورلڈکپ برا گزر رہا تھا لیکن پھر اس نے فائنل میں ٹیم کو فاتح بنا دیا، اس لیے حیران نہ ہوں جب بابر بھی بڑے میچوں میں کچھ کر دے، ان کا مزید کہنا تھا کہ شاہین انجری کے بعد آیا اب وہ مومینٹم میں آ گیا، 4فاسٹ بولرز کا ایک خطرناک کمبی نیشن ہےجبکہ ٹاپ آرڈر نے کام نہیں کیا لیکن مڈل آرڈر نے اچھا کھیلا۔
انہوں نے کہا کہ محمد حارث کی کہانی ایسی ہے کہ سب سننا چاہتے ہیں، اس نے ہر نیٹ سیشن میں حصہ لیا اور فاسٹ بولرز کو اچھا کھیلا، اس ٹورنامنٹ میں سب کا آپ ڈاؤن ہو رہا ہے ،بابر ہر میچ میں رن نہیں بنا سکتا ، ایسا وقت سب پر آتا ہے، وہ بڑا پلیئر ہے، بڑے میچ میں اچھا کھیلے گا۔
میتھیو ہیڈن نے کہا کہ آسٹریلیا میں اگر کوئی گراؤنڈ برصغیر کی ٹیموں کو سوٹ کرتا ہے تو وہ سڈنی ہے جبکہ نیوزی لینڈ نے بھی اس گراؤنڈ پر آسٹریلیا کو ہرایا ہے اس لحاظ سے وہ خطرناک ٹیم ہے، کیویز کا بولنگ اٹیک خطرناک اور تجربہ کار ہے، ساؤتھی میرے ساتھ کھیلا ہے اس سے ان کے تجربے کا اندازہ لگائیں ، واضح رہے کہ کل پاکستان اور نیوزی لینڈ ٹی ٹوئنٹی ورلڈکپ کے پہلے سیمی فائنل میں مدمقابل ہوں گے۔
