گھوٹکی: صحافی طفیل رند قاتلانہ حملے میں جاں بحق، بھیتجی بھی خوف سے چل بسی

گھوٹکی(ڈیلی پاکستان آن لائن)گھوٹکی میں میرپور ماتھیلو پریس کلب کے جنرل سیکرٹری طفیل رند قاتلانہ حملے میں جاں بحق ہو گئے۔فائرنگ سے خوفزدہ ہونے والی مقتول صحافی کی بھتیجی بھی چل بسی۔

نجی ٹی وی چینل جیو نیوز کے مطابق پولیس کا کہنا ہے کہ طفیل رند اپنے دو بچوں اور بھتیجی کو سکول چھوڑنے جارہے تھے کہ ملزمان نے ان پر فائرنگ کر دی، طفیل رند پر میر پور ماتھیلو کے علاقے جروار روڈ مسو واہ پر فائرنگ کی گئی۔

پولیس کا کہنا ہے کہ فائرنگ سے طفیل رند جاں بحق ہو گئے، ان کے جسد خاکی کو ڈی ایچ کیو ہسپتال میرپورماتھیلو منتقل کر دیا گیا ہے۔مقتول صحافی کی 8سالہ بھتیجی فائرنگ کے دوران گر کر معمولی زخمی ہوئی،ڈاکٹرز کاکہنا ہے کہ بچی فائرنگ سے خوفزدہ تھی طبی امداد کے بعد گھر بھیج دیاگیاتھا کہ راستے میں بچی دم توڑ گئی۔پولیس کاکہنا ہے کہ واقعے کی تحقیقات کی جا رہی ہیں۔

وزیراعلیٰ سندھ مراد علی شاہ نے گھوٹکی میں صحافی طفیل رند کے قتل پر اظہار افسوس کرتے ہوئے کہا کہ صحافیوں پر حملے آزادی صحافت پر حملے ہیں۔ وزیراعلیٰ سندھ نے آئی جی سے واقعے کی رپورٹ طلب کرلی۔