نون، میم اور شین سیسہ پلائی دیوار کی طرح متحد ہیں، چچا شہباز شریف سے لڑائی کی افواہوں پر مریم نواز کا رد عمل
پاکپتن(ڈیلی پاکستان آن لائن)وزیراعلیٰ پنجاب مریم نواز نے کہا ہے کہ مخالفین یاد رکھیں، نون، میم اور شین سیسہ پلائی دیوار کی طرح متحد ہیں، پنجاب کے 25 اضلاع میں کرائم ریٹ زیرو ہے۔پاکپتن میں الیکٹرک بسوں کی فراہمی کے افتتاحی منصوبے سے خطاب میں مریم نواز نے کہا کہ مخالفین کوتنقید کیلئےکچھ نہیں ملتا تو نون میں سے شین نکالتے ہیں، شین میں سے نون نکالتے ہیں۔
انہوں نے کہا کہ یاد رکھو، نون، میم، شین سیسہ پلائی دیوار کی طرح متحد ہیں، نون سے شین نکالنے، میم سےنون نکالنا، میم سے شین نکالنا ایسے بڑے آئے، بڑی کوشش کی۔وزیراعلیٰ پنجاب نے مزید کہا کہ 40 سال سے یہ کوشش ہو رہی ہے لیکن ان کو دھول چاٹنا پڑی، آج وہ سب اپنے انجام کو پہنچے، جو اب کر رہے ہیں، وہ بھی انجام کو پہنچیں گے۔ پنجاب میں ترقی اور خدمت پر تنقید کے لیے آپ کو شین، نون، میم ملا ہے تو آپ کو انا للہ وانا الیہ راجعون پڑھ لینا چاہیے۔
وزیر اعلیٰ مریم نواز نے یہ بھی کہا کہ 38 اضلاع تک ترقی نہیں پہنچے گی تو پنجاب ترقی یافتہ نہیں، چھوٹے شہروں کو بھی خوبصورت بنا رہے ہیں، پاکپتن مجھے پہلے سے زیادہ صاف ستھرا نظر آیا۔ کبھی پنجاب میں ہاتھوں سے جھاڑو دیتے لوگ نظر آتے تھے، ستھرے پنجاب کے تحت پورے پنجاب میں ایک طرح کی مشینری ہے۔کسی ضلع کو دوسرےضلع سےصفائی کیلئے مشینری نہیں مانگنا پڑے گی، ستھرا پنجاب توقع سے زیادہ بڑا پروگرام بن چکا ہے۔
اُن کا کہنا تھا کہ کوئی سوچ سکتا تھا کہ میانوالی، وزیرآباد میں الیکٹرک پبلک ٹرانسپورٹ آئے گی، لوگ ٹوٹی پھوٹی بسوں میں سفر کرنے پر مجبور تھے۔الیکٹرک بس کا کرایہ 20 روپے ہوگا، اتنا تو چنگ چی کا بھی کرایہ نہیں ہوتا جبکہ طالب علموں، خواتین، اسپیشل افراد کےلیے بس فری ہے۔ چھوٹےشہروں کو نظر انداز کردیا جاتا تھا، میں ان شہروں کیلئےسہولت لائی ہوں، بسوں کو سی سی ٹی وی سے مانیٹر کرتے ہیں۔
وزیراعلیٰ پنجاب نے کہا کہ لوگوں نے الیکٹرک بسوں پر ایسی خوشی منائی جیسے عید کا سماں ہو، دسمبر تک1100الیکٹرک بسیں آجائیں گی۔ اپریل مئی تک 1500 الیکٹرک بسیں آجائیں گی، بڑی خوشی ہے کہ لوگ اس بس کو استعمال کر رہے ہیں، لوگوں کو ایک باعزت سواری کم کرائے پر دستیاب ہے۔
