پورے صوبے میں ترقیاتی کام جاری ہیں،خطرناک عمارتوں سےمتعلق قانون سازی کر رہے ہیں: ناصر حسین شاہ

کراچی ( ڈیلی پاکستان آن لائن ) وزیر بلدیات سندھ سید ناصر حسین شاہ نے کہا ہے کہ  پورے صوبے میں ترقیاتی کام جاری ہیں ،کراچی میں بڑی کے ساتھ چھوٹی سڑکیں بھی بنا رہے ہیں۔خطرناک عمارتوں سےمتعلق قانون سازی کر رہے ہیں۔

کراچی میں پریس کانفرنس کے دوران وزیر بلدیات  ناصر حسین شاہ نے کہا کہ ترقیاتی سکیم کے حوالے سے مسائل حل کریں گے۔ سعید غنی صاحب سے جو چیزیں رہ گئی ہے ان کو حل کریں گے، شہر کی تمام سڑکوں کو از سر نو بنایا جائے گا۔ کراچی شہر کےاندر بڑی شاہراہوں کیساتھ ساتھ چھوٹی سڑکوں کو بنا رہے ہیں۔ سڑکوں کے ساتھ سیوریج مسائل کو بھی حل کررہے ہیں، پانی کے مسائل کی نشاندہی کریں۔

’’جنگ ‘‘ کے مطابق سید ناصر حسین شاہ نے یہ بھی کہا کہ پورے صوبے میں ترقیاتی کام جاری ہیں، اس سال سب سے زیادہ سکیمیں مکمل کی ہیں۔عمارتوں کو خالی کرانے کے بعد ان کی رہائش کا بندوبست کرنا ہے، اس مقصد کے لیے آباد اور دیگر بھی ہمارے ساتھ ہیں۔سندھ بلڈنگ کے معاملات کو کسی حد تک ٹھیک کیا ہے، مخدوش اور خطرناک عمارتوں سےمتعلق قانون سازی کر رہے ہیں۔