پاکپتن کی تاریخ کا پہلا سرکاری ٹرانسپورٹ سسٹم , 15 بسیں3مختلف شہری روٹس پر چلیں گی
لاہور ( ڈیلی پاکستان آن لائن ) وزیراعلیٰ پنجاب مریم نواز بابا فریدؒ کی دھرتی میں الیکٹرک بس لے آئیں۔پاکپتن کی ساڑھے سات سو سالہ تاریخ کا پہلا سرکاری ٹرانسپورٹ سسٹم کا آغاز کردیا۔وزیراعلیٰ نے پاکپتن میں الیکٹرک بس کا افتتاح کردیا۔پاکپتن میں 15 بسیں 3 مختلف شہری روٹس پر چلیں گی۔جنرل بس سٹینڈ پاکپتن سے بنگہ حیات،عارف والا اور نور پور سیال 5-5 بسیں چلیں گی۔
وزیراعلیٰ مریم نواز نے پاکپتن کی پہلی الیکٹرک بس پر حضرت بختیار کاکی چوک سے ایس پی چوک تک سفرکیا۔وزیراعلیٰ کی آمد پر فقید المثال استقبال کیاگیا۔عوام نے الیکٹرک بس پر پھولوں کی پتیاں نچھاور کیں۔سڑکوں کے اطراف میں کھڑے نوجوانوں کا جوش و خروش اور ہزاروں کا ہجوم ساتھ چلتا رہا۔وزیراعلیٰ مریم نواز مسلسل کھڑے ہو کر نعروں کا جواب دیتی رہیں۔ ’’سب توں اعلیٰ۔۔۔۔ پنجاب دی وزیراعلیٰ‘‘، ’’بابا فرید کی نگری میں جی آیاں نوں ‘‘، ’’مرہم ہے مریم‘‘۔ستھرا پنجاب کے ورکرز بھی عوام کیساتھ ساتھ پوسٹر اٹھائے کھڑے تھے۔
استقبالی ہجوم میں خواتین کی بہت بڑی تعداد بھی شامل تھی۔ایک نوجوان محترمہ کلثوم نواز کا پینسل سکیچ اٹھائے استقبالی ہجوم میں شامل تھا۔الیکٹرک بس کے راستے میں نیو سینی ٹیشن فلیٹ کی جدید گاڑیاں بھی موجود تھیں۔
وزیراعلیٰ مریم نواز نے تقریب گاہ میں ارکان اسمبلی سے ان کی نشستوں پر جا کر ملاقات کی،تقریب سے واپسی پر گاڑی میں بیٹھنے کی بجائے عوام کی جانب چل پڑیں، بچوں، خواتین اور نوجوانوں کا شکریہ ادا کیا۔
