تمام دعوی دھرے کے دھرے رہ گئے ،نوازشریف کے سڑکوں پر نکلتے ہی ساتھ نہ دے کر عوام نے بے نقاب کر دیا: چودھری پرویزالٰہی

تمام دعوی دھرے کے دھرے رہ گئے ،نوازشریف کے سڑکوں پر نکلتے ہی ساتھ نہ دے کر ...
تمام دعوی دھرے کے دھرے رہ گئے ،نوازشریف کے سڑکوں پر نکلتے ہی ساتھ نہ دے کر عوام نے بے نقاب کر دیا: چودھری پرویزالٰہی

  

لاہور (ڈیلی پاکستان آن لائن) پاکستان مسلم لیگ کے سینئرمرکزی رہنما و سابق نائب وزیراعظم چودھری پرویزالٰہی نے کہا ہے کہ حکمرانوں کے تمام دعوی  دھرے کے دھرے رہ گئے ہیں، نوازشریف کے سڑکوں پر نکلتے ہی عوام نے سفر کے آغاز میں ہی ان کا ساتھ نہ دے کر بے نقاب کر دیا ، جی ٹی روڈ پر ’’ ٹھاٹھیں مارتے سمندر میں ‘‘ تنخواہ داروں اور دیہاڑی داروں کے سوا ان کے اردگرد کوئی بھی دکھائی نہیں دیا۔

تفصیلات کے مطابق لاہور میں میڈیا سے گفتگو کرتے ہوئے پاکستان مسلم لیگ  کے مرکزی رہنما اور سابق وزیر اعلیٰ پنجاب  چودھری پرویزالٰہی کا کہنا تھا  کہ  پنجاب میں ن لیگ  کی حکومت ہونے کے باعث ڈپٹی کمشنرز ،  پولیس افسروں، تحصیلداروں اور پٹواریوں کو سڑکوں پر لانے کیلئے دباؤ ڈالا گیا لیکن تمام تر کوششوں کے باوجود لوگ سڑکوں پر نہیں آئے کیونکہ وہ سمجھتے ہیں کہ سپریم کورٹ نے ان کی چوری پکڑ لی ہے۔ چودھری پرویزالٰہی نے ایک سوال کے جواب میں کہا کہ یہ اپنے ٹرائل اور مزید چوریاں پکڑے جانے کے خوف میں مبتلا ہیں جن سے بچنے کیلئے انہوں نے یہ ذریعہ ڈھونڈا جو آغاز ہی میں فلاپ ہوگیا اور آگے بھی بے سود رہے گا کیونکہ عوام جانتے ہیں کہ انہوں نے ملک و قوم کیلئے کچھ نہیں کیا، نوازشریف نے کیا فتح کیا ہے جو جلوس نکال رہے ہیں؟  انہیں یہ بھی پتہ ہے کہ یہ دو تین روزہ جلوس بھی عوامی مفاد میں نہیں بلکہ اپنے کرتوتوں پر پردہ ڈالنے کیلئے نکال رہے ہیں جس کیلئے پنجاب میں اپنی حکومت کا فائدہ اٹھاتے ہوئے تمام سرکاری وسائل، محکمے اور ملازمین استعمال کیے جا رہے ہیں، یہی وجہ ہے کہ عام آدمی سڑکوں پر نظر نہیں آ رہا ہے۔ چودھری پرویزالٰہی نے اپر دیر میں آپریشن کے دوران شہادت حاصل کرنے والے میجر اور جوانوں کو زبردست خراج عقیدت پیش کرتے ہوئے کہا کہ قوم پاک فوج کی ہر قربانی کو نہایت قدر کی نگاہ سے دیکھتی ہے اور پاکستان کیلئے اپنی جانیں قربان کرنے والوں کی احسان مند ہے۔

مزید : قومی