پاکستان کرکٹ ٹیم کے سابق کپتان سلمان بٹ کی پنجاب سیف سٹیز اتھارٹی آمد، لائیو پروگرام میں شرکت

لاہور(ڈیلی پاکستان آن لائن) پاکستان کرکٹ ٹیم کے سابق کپتان اور مایہ ناز اوپنر سلمان بٹ نے پنجاب سیف سٹیز اتھارٹی ہیڈ کوارٹرکا دورہ کیا، سابق کپتان کو پنجاب سیف سٹیز اتھارٹی کے مختلف شعبہ جات کا دورہ کروایا گیا اور کارکردگی بارے بریفنگ دی گئی۔

تفصیلات کے مطابق سلمان بٹ کا کہنا تھا کہ پنجاب پولیس انٹیگریٹڈ کمانڈ کنٹرول اینڈ کمیونیکشن سنٹر کو دیکھ کرخوشگوار حیرت ہوئی ہے، اس بات پر فخر ہے کہ سکیورٹی کیلئے پاکستان میں ایسی جدید ٹیکنالوجی کا استعمال کیا جارہا ہے۔ سلمان بٹ نے کہا کہ پاکستان میں کرکٹ کی بحالی میں سیف سٹیز پراجیکٹ نے کلیدی کردار اداکیا ہے، لاہور سیف سٹی پراجیکٹ کی طرز پر پورے پاکستان میں ایسے منصوبے لگائے جانے چاہییں تاکہ عوام الناس کے جان و مال کا تحفظ یقینی بنایا جا سکے۔ اس موقع پر سابق ٹیسٹ کرکٹرنے سیف سٹی راستہ ایف ایم 88.6 پر لائیو پروگرام میں شرکت کی جہاں انہوں نے سامعین کے سوالات کے جوابات بھی دیئے۔ ایک سوال کے جواب میں انکا کہنا تھا کہ کرکٹ کی تاریخ میں جب بھی بہترین آل راؤنڈر کی فہرست مرتب ہو گی، سابق کپتان عمران خان سرفہرست ہوں گے،سلمان بٹ نے انٹرویو میں اپنے کرکرٹ کیریئر کے یادگار لمحات بھی سامعین کے ساتھ شئیر کیے۔