سات سالہ بچے سے بدفعلی کرنے والا65سالہ درندہ صفت ملزم گرفتار

 کراچی(ڈیلی پاکستان آن لائن)سرجانی ٹاؤن پولیس نے سات سالہ بچے سے بدفعلی میں ملوث 65 سالہ ملزم کو گرفتار کرلیا ہے۔

پولیس کے مطابق 65 سالہ ملزم دکاندار ہے اور بچہ جب چیز (کنفیکشنری)لینے آتا تو اسے بدفعلی کا نشانہ بناتا تھا، ملزم کے خلاف سرجانی ٹاؤن تھانے میں4 اگست کو بچے کے والد محمد عقیل نے مقدمہ الزام نمبر 1298/21 بجرم دفعہ 377/511 کے تحت درج کرایاتھا۔

درج مقدمے میں محمد عقیل نے کہاکہ اس کے سات سالہ بیٹے کو علاقے کا دکاندار اشرف عرف بابو بدفعلی کا نشانہ بناتا ہے، اس نے بچے کو ڈرا دھمکا کر خاموش کرایا ہوا تھا، بچے کی طبیعت جب خراب ہوئی تب اس نے اپنے اہل خانہ کو واقعے کے بارے میں بتایا۔

بچے کے والد نے کہاکہ ملزم ان پر دباؤ ڈال رہا ہے اور مقدمہ ختم کرنے کا کہہ رہا ہے، ہم اعلی حکام سے اپیل کرتے ہیں کہ ہمیں انصاف فراہم کیا جائے۔