اولمپکس مقابلے امریکہ کی برتری کے ساتھ اختتام پذیر

 ٹوکیو  (اے پی پی):جاپان کے دارالحکومت ٹوکیو میں ہونے والے اولمپکس مقابلے امریکا کی برتری کے ساتھ اولمپک سٹیڈیم میں منعقد ہونے والی رنگارنگ تقریب کے ساتھ اختتام پذیر ہو گئے۔ 17 دن جاری رہنے والے ٹوکیو اولمپکس میں میڈل ٹیبل پر امریکا نے 39 گولڈ، 41 سلور اور 33 برانز میڈلز کے ساتھ پہلی پوزیشن حاصل کی جبکہ اس کے مجموعی تمغوں کی تعداد 113 رہی۔ چین 38 سونے، 32 چاندی اور 18 کانسی کے تمغوں کے ساتھ دوسرے نمبر پر رہا، اس کے مجموعی تمغوں کی تعداد 88 رہی۔ میزبان جاپان نے 27 گولڈ، 14 سلور اور 17 برانز میڈلز جیتے،  مجموعی طور پر 58 میڈلز کے ساتھ تیسری پوزیشن حاصل کی۔ برطانیہ نے 22 گولڈ، 21 سلور اور 22 برانز میڈلز کے ساتھ چوتھی، روس نے 20 گولڈ، 28 سلور اور 23 برانز میڈلز کے ساتھ پانچویں، آسٹریلیا نے 17 گولڈ، 7 سلور اور 22 برانز میڈلز کے ساتھ چھٹی، ہالینڈ نے 10 گولڈ، 12 سلور اور 14 برانز میڈلز کے ساتھ ساتویں پوزیشن حاصل کی۔