ادویات کی قیمتوں میں بارہویں دفعہ اضافہ مافیاز کو ہی نوازنے کا تسلسل ہے: سراج الحق 

 لاہور/راولپنڈی (این این آئی) امیر جماعت اسلامی پاکستان سراج الحق نے کہاہے کہ حکومت کے تین سالوں میں مہنگائی و بے روزگار ی میں اضافہ اور مافیاز کی گرفت مزید مضبوط ہوئی۔ ادویات کی قیمتوں میں بارہویں دفعہ اضافہ مافیاز کو ہی نوازنے کا تسلسل ہے۔آٹا، چینی، پٹرول، ڈرگ و لینڈ مافیاز نے باری باری ملک کو نچوڑا۔ وزیراعظم عمران خان جن مجرموں کے خلاف سپریم کورٹ میں گئے، آج وہ ان کے ساتھ شامل ہیں۔ پاکستان میں مافیاز نے 22 کروڑ عوام کویرغمال بنا رکھا ہے۔حکومت اپوزیشن میں کس بات کی صلح کرائیں،دونوں ذاتی مفادات کے لیے برسرپیکار ہیں۔ملک کا اہم ترین شہر راولپنڈی منشیات فروشی کا گڑھ بن گیا ہے۔منشیات کے بڑے بڑے اڈے چلائے جا رہے ہیں۔آئندہ انتخابات میں جماعت اسلامی ہر حلقے میں امید وار کھڑا کرے گی۔ طالبان سے اپیل ہے وہ افغان شہروں میں پرامن طریقے سے داخل ہوں،جماعت اسلامی افغانستان میں امن کے لیے کردار ادا کرتی رہے گی۔ ملک کو ترقی کی راہ پر گامزن کرنے کے لیے جماعت اسلامی واحد اور بہترین آپشن ہے۔ ان خیالات کا اظہار انہوں نے اتوار کو اپنے تین روزہ دورہ راولپنڈی کے حوالے سے پریس کانفرنس کرتے ہوئے کیا۔جماعت اسلامی شمالی پنجاب کے امیر ڈاکٹر طارق سلیم،عارف شیرازی،شمس الرحمن سواتی و دیگر رہنماء بھی موجود تھے۔سراج الحق نے تین روز کے دوران راولپنڈی کے وکلاء،تاجروں،نوجوانوں،مقامی رہنماؤں،خواتین کے وفود،سکولوں اور شادی ہالوں کی ایسوسی ایشنز،عام شہریوں کے وفود سے ملاقاتیں کیں۔میڈیا سے گفتگو کرتے ہوئے امیر جماعت نے کہا کہ پی ٹی آئی حکومت میں عوام مہنگائی کا بوجھ اٹھانے سے قاصر ہے۔ اب تک صرف ادویات کی قیمتوں میں 50 سے 300 گنا سے زائد اضافہ کیا جاچکاہے۔ ملک میں عملی طور پر مافیاز کی حکومت ہے۔ آٹا،چینی، پٹرول،ڈرگ، لینڈ مافیاز باری باری اربوں روپے عوام کی جیبوں سے نکلوا چکے ہیں۔ راولپنڈی کی صورتحال انتہائی افسوسناک ہے۔کراچی سے چترال تک تمام شہروں کے لوگ پریشان ہیں مگر پاکستان میں سب سے زیادہ راولپنڈی کے لوگ پریشان ہیں۔تعلیم یافتہ نوجوان بیروزگاری سے تنگ آ کر ڈگریاں جلا رہے ہیں اور خود کو بوجھ تصور کررہے ہیں۔ راولپنڈی میں ہر قسم کا مافیا ہے منشیات کے بڑے بڑے اڈے ہیں اور منشیات فروشی کا نیٹ ورک راولپنڈی میں گلی،کوچوں،محلوں تک پھیل گیا ہے سکولز کی بچیاں تک منشیات سے محفوظ نہیں ہیں۔صاف پانی سے محروم ہیں۔
سراج الحق