ثنا اللہ زہری، عبدلاقادر بلوچ، یونس چنگیزی پیپلز پارٹی میں شامل، عوام پہچا ن چکے، تبدیلی سرکار کا اصل چہرہ، مہنگائی، غربت، بیروزگاری ہے: بلاول بھٹو

کوئٹہ(مانیٹرنگ ڈیسک،نیوز ایجنسیاں)بلوچستان کے سابق وزیراعلیٰ ثنااللہ زہری،سابق وفاقی وزیر لیفٹیننٹ جنرل (ر)عبدالقادر بلوچ،سابق رکن بلوچستان اسمبلی کرنل (ر) یونس چنگیزی، سمیت کئی بڑے ناموں نے پیپلزپارٹی میں شمولیت کا  باضابطہ اعلان کر دیا۔ مسلم لیگ (ن)چھوڑنے والے بلوچستان کے سابق وزیراعلیٰ  ثنااللہ زہری   کہا کہ میں 1988سے سیاست کر رہا ہوں، پہلے ہم نے نواز شریف کو آگے کیا پھر ہم نے غلام اسحق خان کے ذریعے سازش کرکے بینظیر بھٹو کی حکومت ختم کی،ہم نے نواز شریف کو پھر آگے کیا اور وزیراعظم بنایا تو ان کا پہلا شکار غلام اسحق خان بنے، نواز شریف کی سرشت میں وفا نہیں ہے۔انہوں نے کہا کہ 2013میں الیکشن ہم نے جیتا اور باتیں سنیں کہ وہ قوم پرستوں کوحکومت دے رہے ہیں تو جنرل عبدالقادر بلوچ کو رائیونڈ بھیجا تو انہوں نے کہا میری پارٹی جیتے گی اور میں کسی اور کو حکومت دوں گا پھر میں نے خود بات کی تو وہی جواب دیا۔ثنااللہ زہری نے کہا بلوچستان کے عوام گواہ ہیں کہ نواز شریف نے جس پارٹی کی اکثریت نہیں تھی، تیسرے نمبر کی جماعت، جس کے 8سے 9ارکان تھے،کو مسلم لیگ (ن)کے 22سے 23اراکین تھے، ان پر ترجیح دی اور انہیں وزیراعلیٰ بنایا۔ میں نواز شریف کا شکریہ ادا نہیں کروں گا کیونکہ اتحادی جماعتوں پختونخوا میپ کے درمیان اختلافات پیدا ہوئے اور ڈاکٹر عبدالمالک سے حکومت نہیں چلی تو ڈھائی سالہ معاہدے پر عمل درآمد کیا۔سابق وزیراعلیٰ بلوچستان نے بلاول بھٹو کو مخاطب کر کے کہا اگر نواز شریف کا بس چلتا تو اس پر بھی عمل درآمد نہیں کرتا، ہمیں اور کچھ نہیں چاہیے، ہمیں عزت چاہیے، ہم آپ سے توقع رکھیں گے جو نواز شریف نے ہمارے ساتھ کیا وہ آپ نہیں کریں گے۔ آج سے ہم پیپلزپارٹی کا باقاعدہ حصہ ہیں اور میں ایک ورکر کی حیثیت سے پیپلزپارٹی کے لیے کام کروں گا، مسلم لیگ  ن کے لیے جتنا کام کیا اور قربانیاں دی ہیں، اس سے بڑھ کر کروں گا کیونکہ یہ شہید ذوالفقار علی بھٹو اور بینظیر بھٹو کی جماعت ہے، جن کو میں بہن کہتا تھا۔ان کا کہنا تھا یہ بلاول بھٹو اور آصف زرداری کی پارٹی ہے، میں اپنا خون پسینے کو ایک کرکے اس پارٹی کو آگے لے کر جاؤں گا۔اس سے قبل مسلم لیگ (ن)کے سابق صوبائی صدر اور وفاقی وزیر عبدالقادر بلوچ نے بھی پیپلزپارٹی میں شمو لیت کا اعلان کرتے ہوئے کہا ہر علاقے کا سیاسی مزاج مختلف ہے۔ بلوچستان کے مختلف علاقوں میں پیپلزپارٹی کا نظریاتی ووٹ موجود ہے اور یہاں سے علاقائی جماعتوں کے علاوہ مرکزی جماعتوں نے بھی کامیابی حاصل کی ہے۔ مسلم لیگ (ن)کو خیرباد کہہ دیا اور آج بلوچستان میں مسلم لیگ(ن)کی کوئی قدآور شخصیت نہیں ہے، پیپلزپارٹی نے اپنی قابلیت پر بلوچستان میں اپنی پوزیشن بنائی، اگر صحیح کام کیا تو یہا ں ہماری اکثریتی حکومت بنے گی، پیپلزپارٹی اور بلاول بھٹو کے شکر گزار ہیں،پیپلزپارٹی نے اپنے دور حکومت میں صوبوں کو حقوق دیئے،بلوچستان کو پیپلزپارٹی کی ضرورت ہے، پیپلز پارٹی کا نظریاتی ووٹ ہمار ے علاقوں میں موجود ہے۔
پیپلز پارٹی شمولیت

کوئٹہ(مانیٹرنگ ڈیسک،نیوز ایجنسیاں)پاکستان پیپلز پارٹی کے چیئر مین رکن قومی اسمبلی بلاول بھٹو زرداری نے کہا ہے عوام پہچان چکے ہیں کہ تبدیلی سرکارکا اصل چہرہ مہنگائی،تاریخی غربت، بے روزگاری ہے اگر ہم نے ان مسائل سے نکلنا ہے تو پاکستان پیپلز پارٹی کا ساتھ دینا ہوگا، پیپلز پارٹی آئندہ عام انتخابات میں ملک بھر بلخصوص بلوچستان میں حکومت بنائے گی اور ہم جیالہ وزیراعلیٰ منتخب کر کے دیکھائیں گے اور بلوچستان کے مسائل کا حل نکالیں گے، مسلم لیگ(ن) اور عمران خان کی تبدیلی سرکار صرف عوام کے حقوق سلب کرنا جانتے ہیں پیپلز پارٹی و ہ واحد جماعت ہے جو عوام کے حقوق کا دفاع کرنا اور یہ جانتی ہے کہ عوام کو انکے حقوق کیسے پہنچائے جائیں۔یہ بات انہوں نے اتوار کو جتک ہاؤس کوئٹہ میں چیف آف جھالاوان سابق وزیراعلیٰ نواب ثناء اللہ زہری،لیفٹیننٹ جنرل (ر) عبدالقادر بلوچ، نواب محمد خان شاہوانی، آغا عرفان کریم سمیت دیگر کی پیپلز پارٹی میں شمولیت کے موقع پر منعقدہ جلسے سے خطاب کرتے ہوئے کہی۔ چیئرمین پیپلز پارٹی بلاول بھٹو زرداری نے کہا کہ آج ہم بلوچستان میں نواب ثناء اللہ زہری، جنر ل (ر) عبدالقادر بلوچ اور انکے ساتھیوں کو  شہداء کی جماعت پاکستان پیپلز پارٹی میں شامل ہونے پر خوش آمد ید کہتے ہیں ہم ایک دوسرے کوشانہ بشانہ رہ کر محنت و جدوجہد سے ایک دوسرے کو طاقت دیں گے اور پورے بلوچستان میں قائد عوام اور شہید بے نظیر بھٹو کی پیپلز پارٹی کو فعال اور مضبوط بنائیں گے انشاء اللہ آنیوالے عام انتخابات میں ملک بھر بلخصوص بلوچستان میں حکومت بنائیں گے ہم جیالا وزیراعلیٰ منتخب کر کے دیکھائیں گے اور بلوچستان کے مسائل کا حل نکالیں گے انہوں نے کہا کہ بلوچستان کے عوام غیرت مند،بہادر ہیں پاکستان پیپلز پارٹی اور بلوچستان کا تین نسلوں کا رشتہ ہے بلوچستان کے عوام نے قائد عوام شہید ذوالفقار علی بھٹو کا ساتھ اور ہم نے تاریخ رقم کی تھی انہوں نے کہا کہ پاکستان پیپلز پارٹی نے غریب عوام کو آواز دی،ملک کے غریب کسانوں کو زمین کا مالک بنایا،مزدوروں کو حقوق دلوائے جب عوام نے شہید بے نظیر بھٹو کا ساتھ دیا تو ہم نے ایک بار پھر تاریخ رقم کی اور بے نظیر بھٹو کی شہادت کے بعد آصف علی زرداری کا عوام نے ساتھ دیکر تیسری بار تاریخ رقم کی صدر آصف علی زرداری کے دور میں ہم نے صوبوں اور عوام کو وہ حقوق دئیے جنکا وعدہ شہید ذوالفقار علی بھٹو کے دور میں کیا گیا تھا، پیپلزپارٹی نے این ایف سی ایوارڈ اور 18ویں ترمیم کے ذریعے صوبوں کو انکے وسائل پر ملکیت دی ہماری یہ سوچ تھی کہ جہاں بھی معدنی ذخائر ہونگے وہاں پر اس علاقے کی عوام کا پہلا حق ہوگا صدر آصف علی زرداری نے غریب عوام کو حقوق دلوائے، بے نظیر انکم سپورٹ پروگرام شروع کیا تاکہ ملک کے غریب لوگوں کی مالی امداد کی جاسکے، ہماری حکومت نے فو ج سمیت تمام سرکاری ملازمین کی تنخواہوں اور پنشن میں اضافہ کیا تھا مگر افسوس کے ساتھ پیپلز پارٹی کی حکومت کے بعد مسلم لیگ(ن) کی حکومت بھی آئی،عمران خان کی تبدیلی حکومت بھی آئی ان تمام حکومتوں نے عوام کے حقوق سلب کرنے کی کوشش کی آج حکومت نظریں 18ویں ترمیم،این ایف سی ایوارڈ، ساحل و سائل،جزیروں سمیت عوام کے تمام حقوق پر ہیں اور وہ انہیں چھیننا چاہتی ہے صرف ایک پیپلز پارٹی ہے جو عوام کے حقوق کا دفاع کرنا اور یہ جانتی ہے کہ عوام کو انکے حقوق کیسے پہنچائے جائیں انہوں نے کہا کہ قائد عوام شہید ذوالفقار علی بھٹو کا منشور اور شہید بے نظیر بھٹو کی نصیحت کو لیکر بلوچستان کے ہر ضلع میں پہنچیں گے اور اگر عوام نے ہمارا ساتھ دیا تو دنیا کی کوئی طاقت ہمارا راستہ نہیں روک سکتی انہوں نے کہاکہ بلوچستان کے عوام نے بہت سی مشکلات دیکھی ہیں پانچ سال پہلے وکلاء کے ساتھ بہت بڑا دہشتگردی کا واقعہ اور سانحہ پیش آیا آج تک ہم انہیں انصاف نہیں دلوا سکے آج بھی نااہل اور نالائق حکومت کے دور میں جگہ جگہ نا انصافی اور مظالم ہورہے ہیں پیپلز پارٹی و ہ واحد جماعت ہے جو بلوچستان کے حقوق کا دفاع کر سکتی ہے انہوں نے کہا کہ سیاست میں ایک نئی نسل شروع ہورہی ہے میں سندھ، بلوچستان،پنجاب، خیبر پختونخواء کے نوجوانوں کے ساتھ ملکر ایک نئی تاریخ رقم کرنا چاہتاہوں میرا خواب اور وژن ہے کہ اس ملک کے عوام ترقی کریں، عوام کو اپنی محنت کا صلہ ملے کسان کو اپنی فصل کی قیمت، مزدور کو اپنی محنت کا صلہ ملے اور ایک ہی جماعت ہے جو غریب عوام اور عام آدمی کا ساتھ دیتی ہے وہ پاکستان پیپلز پارٹی ہے ہم نے ایک بار ماضی میں غریب عوام کی قسمت بدلی اب ہمیں ایک بار پھر عام اور غریب آدمی کا مستقبل تبدیل کرسکیں انہوں نے کہا کہ شہید محترمہ بے نظیر بھٹو کا خواب تھاکہ بچے بچے کے پاس انکے حقوق، بولنے،سیاست کرنے کی آزادی ہوصاف وشفاف انتخابات ہوں ہمیں ملکر کام کرنا پڑیگا اور ہم پاکستان پیپلز پارٹی کو کامیاب بنا کر ایسی عوامی حکومت قائم کریں گے جو عام آدمی کے مسائل حل کرسکتی ہوں انہوں نے کہا کہ عوام پہچان چکے ہیں کہ تبدیلی کا اصل چہرہ مہنگائی،تاریخی غربت، بے روزگاری ہے اگر ہم نے ان مسائل سے نکلنا ہے تو پاکستان پیپلز پارٹی کا ساتھ دینا ہے انہوں نے کہا کہ جو لو گ شامل ہوئے ہیں انکا شکرگزارہوں انکے ساتھ ملکر پارٹی کو فعال اور مضبوط بنائیں گے پارٹی کو دوبارہ منظم کریں گے صوبائی صدر چنگیز جمالی کی کورونا وائرس سے جلد صحت یابی کے لئے پرامیدہوں ہم نے ملکر کام کرنا ہے انہوں نے کہا کہ ہم عزت کی سیاست کرتے ہیں بلوچستان کے عوام کو عزت دیں گے۔
بلاول