صوبہ سندھ میں اسکول 19اگست تک بند رہیں گے: وزیرتعلیم سندھ 

کراچی(اسٹاف رپورٹر)سندھ کے وزیرِ تعلیم سیدسردار شاہ نے کہاہے کہ صوبہ سندھ میں اسکول 19 اگست تک بند رہیں گے، یقینی بنائیں گے اساتذہ کی ویکسی نیشن مکمل ہو جائے، محرم میں ایس او پیز کا خیال نہ رکھا تو شرح میں اضافہ ہوسکتا ہے، کراچی میں کورونا مثبت کیسز کی شرح 23 فیصد ہے،کوشش ہے کہ تعلیمی اداروں سے متعلق کورونا پالیسی ہو، میڈیکل کمیشن کو صوبوں کے ساتھ چلنا پڑے گا، چیلنجز درپیش ہیں، نظام برسوں سے بگڑا ہوا ہے،، امتحانی مراکز میں موبائل فونز لانے کی اجازت نہیں ہوگی۔اتوارکووزیر ِتعلیم سندھ سید سردار شاہ نے وزیر برائے یونیورسٹی اینڈ بورڈزاسماعیل راہو کے ہمراہ کراچی میں پریس کانفرس کرتے ہوئے کہا کہ 7 محرم سے جلوس شروع ہو جاتے ہیں جس سے بچوں کو تکلیف ہوتی ہے، اس لیے 19 اگست تک اسکول بند رہیں گے، 7 اور 8 محرم کو صورتحال پر نظرثانی کے لیے دوبارہ اجلاس بلائیں گے۔انہوں نے کہا کہ پاکستان میڈیکل کمیشن کو صوبوں کے ساتھ چلنا پڑے گا، 90 کی دھائی میں جو اساتذہ بھرتی ہوئے ان سے جان چھڑانی ہے۔وزیرِ تعلیم سندھ نے کہا کہ ہمیں اپنے تعلیمی نصاب میں جدت لانی ہے، تعلیم صوبائی معاملہ ہے مگر این سی او سی کے پابند ہیں، اساتذہ اور اسٹاف کی ویکسینیشن پر بھی نظر رکھی جائے گی۔سردارشاہ نے کہا کہ کوشش کریں گے کہ وفاق اور صوبے کے فیصلوں میں تضادات دور کریں، ہمیں اپنے نصاب پر نظرِ ثانی کرنا ہو گی، ہم آج تک ریڈیو کے معجزات پڑھا رہے ہیں۔اس موقع پر وزیر برائے یونیورسٹی اینڈ بورڈز اسماعیل راہو نے کہا کہ امتحانات میں نقل کی اجازت نہیں ہو گی، اسکول کا نظام بہتر کریں تو والدین اپنے بچوں کو سرکاری اسکول ہی لائیں گے۔انہوں نے کہا کہ 10 اگست سے انٹر کے رہ جانے والے پرچے شروع کرنے کا فیصلہ کیا ہے۔انہوں نے کہاکہ اجلاس میں فیصلہ ہوا ہے کہ تعلیمی ادارے عاشورہ تک بند رہیں گے، جب کہ بورڈ کے رہ جانے والے امتحانات 6 محرم تک لئے جائیں گے۔دریں اثناء صوبے میں بورڈز کے امتحانات کروانے کے حوالے سے اعلی سطح کا اجلاس ہوا، اجلاس وزیر تعلیم سردار علی شاہ اور وزیر یونیورسٹیز اینڈ بورڈز اسماعیل راہو کی سربراہی میں ہوا، جس میں محکمہ کالج ایجوکیشن کے سیکریٹری، سیکریٹری یونیورسٹیز اینڈ بورڈز، صوبے کے تمام تعلیمی بورڈز کے چیئرمین سمیت دیگر متعلقہ افسران بھی شریک ہوئے۔