پاک سر زمین پارٹی کبھی بھی لسانی سیاست نہیں کرے گی: مصطفی کمال 

 کراچی (اسٹاف رپورٹر) پاک سرزمین پارٹی کے چیئرمین سید مصطفی کمال نے کہا ہے کہ جو لوگ ہمیں ایک ہونے کا مشورہ دیتے ہیں کہ مہاجر ایک ہوجائیں وہ یہ بتائیں کہ پھر پٹھان، سندھی، بلوچی اور پنجابی ایک نہیں ہونگے اور 35سالوں سے ایک تھے تو کیا حاصل کر لیا۔ یہ ناعاقبت اندیش لوگ پھر سے حالات کو اسی جانب دھکیلنا چاہتے ہیں جب مہاجروں کو بسوں سے اتار کر شناختی کارڈ دیکھ کر مارا جاتا تھا، لیاری کے بلوچ رنچھوڑ لائن نہیں آ سکتے تھے، چکرا گوٹھ کے سندھی کورنگی نہیں جاسکتے تھے، کٹی پہاڑی کے پٹھان بورڈ آفس نہیں آ سکتے تھے اور مہاجر ان علاقوں سے نہیں گزر سکتے تھے۔پیپلز پارٹی لسانی بنیادوں پر تمام قومیتوں کو مہاجروں کے خلاف استعمال کرتی آئی ہے۔ پیپلزپارٹی نے کبھی امن کمیٹی کی صورت میں تو کبھی جیے سندھ کی تحریک کے نام پر ظلم کیا ہے۔ پاک سر زمین پارٹی شرعی اور دنیاوی وجوہ کی بنا پر کبھی بھی لسانی سیاست نہیں کرے گی۔ ہم آج جب مہاجروں کے حقوق کی بات کرتے ہیں تو اپنے سندھی، پختون، پنجابی، بلوچی بھائی کو اپنا دشمن بنا کر نہیں بلکہ اپنے ساتھ شامل کر کے اپنی طاقت بنا کر کرتے ہیں۔ حکمرانوں نے تمام قومیتوں پر ظلم کیا ہے۔ ہم نے مسائل ہی اجاگر نہیں کیئے قابل عمل حل پیش کیا جس میں تمام پاکستانیوں فائدہ ہے اور کراچی سے کشمور تک کے مسائل حل ہونگے۔ ان خیالات کا اظہار انہوں نے پاکستان ہاس میں پی ایس پی لاڑکانہ کے عہدے داران سے ملاقات کے دوران کیا۔ انہوں نے مزید کہا کہ پیپلز پارٹی کی متعصبانہ حکومت کی وجہ سے سندھ دیگر صوبوں کے مقابلے سب سے زیادہ وسائل رکھنے کے باوجود ترقی نہیں کر سکا۔ کراچی آج رہنے کے لائق دنیا کی 4 بدترین جگہوں میں شامل ہے۔ پیپلز پارٹی کی کرپشن سے صرف مہاجروں کا نہیں بلکہ تمام قومیتوں بالخصوص سندھیوں کا سب سے زیادہ نقصان ہوا ہے۔ چند لاکھ نوکریاں دے کر کروڑوں سندھیوں سے انکے حقوق چھین لیئے گئے اور اربوں روپے اپنی جیبوں میں ڈال لیئے۔ 10 ہزار ارب سے زائد پیپلز پارٹی کی حکومت کو وفاقی حکومت سے مل کے خرچ ہو چکے لیکن صوبے کے حالات بد سے بدتر ہیں۔ مسائل کا حل ایک ہونے میں نہیں نیک ہونے میں ہے۔ جب باکردار لوگ سڑکوں پر نکل کر غلط پالیسیوں پر حکمرانوں کو للکارے گے، مسائل حل ہونا شروع ہو جائیں گے۔ یہی وجہ ہے کہ عاشور کے بعد پی ایس پی پیپلزپارٹی کی تعصب زدہ حکومت کیخلاف عوامی احتجاج کرئے گی۔ پاک سرزمین پارٹی کی پیش کردہ تجاویز ہی سندھیوں، مہاجروں، پختونوں اور پنجابیوں سمیت تمام قومیتوں کے مسائل کا واحد حل ہے۔