عالمی سطح پر کورونا ویکسین کی قلت کے باوجود پاکستان کورونا ویکسین کے حصول میں کامیاب ہوگیا

اسلام آباد ( ڈیلی پاکستان آن لائن ) عالمی سطح پر کورونا ویکسین کی قلت کے باجود پاکستان کورونا ویکسین کے حصول میں کامیاب ہو گیا ، رواں ماہ پاکستان میں تین کروڑ 50 لاکھ سے زائد ویکسین ڈوز پاکستان آئیں گی ۔
نجی ٹی وی اے آر وائی نے ذرائع کے حوالے سے بتایا کہ رواں ماہ پاکستان آنے والی تین کروڑ سے زائد ڈوز پاکستان نے خریدی ہیں ، چین سے پاکستان میں سائنو فارم ، کین سائنو ، سائینو ویک آئے گی ، ماہ کے اختتام پر فائزر کمپنی سے پاکستان میں کھیپ پہنچے گی جس میں ایک کروڑ تیس لاکھ ڈوز ہوں گی ۔
پاکستان کو رواں ماہ کوویکس سے ویکسین کی بھاری مقدار پہنچے گی، کوویکس سے پاکستان کو سائنو فارم ، آسٹرازینکا ، فائزر ملے گی ۔
پاکستان نے دو کروڑ 13لاکھ سے زائد ڈوز گزشتہ ماہ درآمد کی تھیں ، گزشتہ ماہ پاکستان نے ایک کروڑ 45 لاکھ ڈوز خریدی تھیں ، کوویکس نے گزشتہ ماہ 67 لاکھ 40ہزار ڈوز پاکستان کو دی تھیں ۔