سینیٹ الیکشن میں ووٹ بیچنے کی ویڈیو، وزیر اعظم نےصوبائی وزیر قانون کو فارغ کردیا
اسلام آباد (ڈیلی پاکستان آن لائن) وزیر اعظم عمران خان نے 2018 کے سینیٹ الیکشن میں مبینہ طور پر پیسوں کے بدلے ضمیر کا سودا کرنے والے وزیر قانون خیبر پختونخوا کی چھٹی کرنے کا فیصلہ کرلیا۔
وزیر اعظم کے معاون خصوصی برائے سیاسی روابط ڈاکٹر شہباز گل نے اپنے ایک ٹویٹ میں بتایا کہ وزیر اعظم عمران خان نے خیبر پختونخوا کے وزیر قانون سلطان محمد خان سے استعفیٰ لینے کا فیصلہ کیا ہے، انہوں نے وزیر اعلیٰ خیبر پختونخوا کو اس بارے میں احکامات دے دیے ہیں۔ شہباز گل کے مطابق 2018 کے سینیٹ الیکشن میں اپنا ووٹ فروخت کرنے والے معاملے کی تفصیلی انکوائری کرکے رپورٹ وزیر اعظم کو پیش کی جائے گی۔
خیال رہے کہ آج ایک ویڈیو سوشل میڈیا پر وائرل ہوئی ہے جس میں دیکھا جاسکتا ہے کہ سینیٹ الیکشن 2018 کے دوران کس طرح نقد رقم کے ذریعے تحریک انصاف کے ووٹوں کو خریدا گیا۔مبینہ طور پر پیسوں کے بدلے ووٹ فروخت کرنے والوں میں خیبر پختونخوا کے موجودہ وزیر قانون سلطان محمد خان بھی شامل تھے جو اس وقت تحریک انصاف کی اتحادی جماعت قومی وطن پارٹی کا حصہ تھے۔
وزیراعظم عمران خان کا KP کے وزیر قانون سے استعفی لینے کا فیصلہ۔ وزیراعظم نے وزیراعلی Kp کو احکامات دے دئیے۔ اس بات کی تفصیلی انکوائری کر کے رپورٹ پیش کی جائے گی۔
— Dr. Shahbaz GiLL (@SHABAZGIL) February 9, 2021