آنے والا وقت کراچی کیلئے ہرا بھرا ہوگا،بیرسٹر مرتضی وہاب

کراچی (سٹاف رپورٹر)ایڈمنسٹریٹر کراچی مرتضی وہاب نے کہا ہے کہ آنے والا وقت کراچی کے لیے ہرا بھرا ہوگا، دنیا کے سامنے ہم اپنا مثبت امیج اجاگر کرتے رہیں گے۔مرتضی وہاب نے ڈاکٹر ضیا الدین احمد روڈ پر برنس گارڈن کی تزئین و آرائش کا افتتاح کردیا ہے۔اس موقع پر میڈیا سے گفتگو کرتے ہوئے انہوں نے کہا کہ برنس گاڑن میں شجرکاری کی ہے، پارک کے اطراف واکنگ ٹریک بھی بنایا ہے۔انہوں نے کہا کہ برنس گارڈن میں نئے داخلی و خارجی دروازے نصب کیے گئے، مذکورہ گارڈن شہریوں کے لئے اچھی تفریح کا ذریعہ بنے گا، شہری اپنی فیملیز کے ہمراہ برنس گارڈن آکر لطف اندوز ہوں، ماضی کا یہ بڑا پارک خستہ حالی کا شکار تھا۔مرتضیٰ وہاب نے کہا کہ کے ایم سی نے جب پارک کھولنے کا فیصلہ کیا تب کئی مشکلات نظر آئیں، پیپلز اسکوائر بنایا ہے، اس کے ساتھ 1927 کے قدیم پارک کو بھی بحال کیا۔انہوں نے کہا کہ شہری نہ صرف پارک بلکہ میوزیم کو بھی دیکھ سکیں گے، برنس گارڈن کا دوسرا داخلہ سیکریٹریٹ کی طرف رکھا ہے، پارک سے متصل ٹیرس گارڈن بھی ہے، اس کو بھی بحال کیا ہے۔ایڈمنسٹریٹر کراچی نے کہا کہ کوئی نئے اختیارات نہیں، کوئی اضافی فنڈز نہیں، ہماری ترجیحات کام کرنا ہے، بہار کی آمد آمد ہے، ہم فروٹ گارڈن بھی بنائیں گے۔